गण्डकी प्रदेशमा २४ घण्टाभित्रै पीसीआर टेस्टको नतिजा आउँछ भनिएपनि ४–५ दिनसम्म लागेको अनुभव स्वाब दिनेहरुले संगालेका छन् । प्रयोगशालामा पर्याप्त जनशक्तिको अभावमा यस्तो हुन पुगेको उनीहरुको भनाई छ । त्यसमाथि ल्याबमा काम गर्ने ३ जना प्राविधिकलाई नै कोरोना पुष्टि भएको छ ।

कोरोना परीक्षणमा खटिएका ३ प्रयोगशालाकर्मीमा कोरोना संक्रमण पुष्टि भएको आइतबार जनाइएको छ । प्रदेश क्षयरोग उपचार केन्द्र, पोखरामा खटिएका ३ जनामा पोजेटिभ देखिएको प्रदेश जनस्वास्थ्य प्रयोगशालाले जनाएको हो ।

प्रयोगशालाकी निमित्त प्रमुख सपना सुवेदीका अनुसार केही प्रयोगशालाकर्मीमा कोरोनासँग मिल्दोजुल्दो लक्षण देखिएपछि परीक्षण गर्दा ३ जनाको पोजेटिभ आएको हो । पहिले पोखरा स्वास्थ्य विज्ञान प्रतिष्ठानको प्रयोगशालामा मात्रै हुँदै आएकोमा असार पहिलो हप्तादेखि उक्त ल्याबमा कोरोना परीक्षण हुँदै आएको छ ।

दुवै प्रयोगशालामा गरेर दैनिक ६ सयभन्दा बढी स्वाब परीक्षण हुँदै आएको छ । प्रदेश सरकारले स्थापना गरेको क्षयरोग उपचार केन्द्रस्थित सो ल्याबमा प्रदेशका ११ जिल्लाकै नमुना परिक्षणको सुविधा छ ।