बिहीबार पहाडी क्षेत्रका केही ठाउँमा पानी पर्ने मौसम पूर्वानुमान महाशाखाले जनाएको छ । बंगालको खाडीमा बनेको न्यूनचापीय क्षेत्र अरब सागर तिर सर्ने क्रममा रहेकाले नेपालमा थोरै प्रभाव परेको मौसम पूर्वानुमान महाशाखाले जनाएको हो ।

बंगालको खाडीमा बनेको न्यूनचापीय क्षेत्र अरब सागरतर्फ सर्ने क्रममा रहेकाले प्रदेश १, बागमती र गण्डकीका पहाडी क्षेत्रमा पानी पर्ने सम्भावना छ । तीन प्रदेशका पहाडी क्षेत्रमा मौसम आंशिक बदली भएर एक दुई ठाउँमा पानी पर्ने सम्भावना रहेको मौसमविद्को भनाइ छ ।

देशका अन्य भागको मौसम भने सफा रहने छ । त्यसैगरी बिहीबार राति प्रदेश १ का एक दुई ठाउँमा हल्का पानी पर्ने सम्भावना छ । शुक्रबार र शनिबारसमेत केही ठाउँमा पानी पर्ने सम्भावना रहेको पूर्वानुमान मौसमविदले गरेका छन् । पानी परे पनि अब ठूलो वर्षा र झरीको संभावना छैन ।

नेपालमा अझैपनि केही दिन हल्का पानी भने परिरहने छ । यो वर्षको मनसुन सकिन अझै केही दिन लाग्नेछ ।