पोखरा – उद्योग विभागको नयाँ तथ्यांक अनुसार चालु आवमा सबैभन्दा बढी पर्यटन क्षेत्रमा लगानीको प्रतिवद्धता आएको छ । विभागका अनुसार चालु आवमा मात्रै पर्यटन क्षेत्रमा कुल १३ अर्ब २५ करोड रुपैयाँ बराबरको विदेशी लगानीको प्रतिवद्धता आएको छ ।

यस्तै कोरोना महामारीका बीच पर्यटकीय नगरी पोखरामा ३ अर्ब रुपैयाँको विदेशी लगानीमा होटल तथा रेष्टुराँ खुल्ने तयारी भएको छ । विभागले ब्रिटिस भर्जिन आइल्यान्डबाट होटल तथा रेष्टुराँ सञ्चालनका लागि लगानीको प्रतिबद्धता आएको जानकारी दिएको छ । विभागका अनुसार कुल ३ अर्ब लगानीमा स्थापना हुने उक्त होटल तथा रेष्टुराँमा ९० वटा रुम र २०० वटा सिट क्षमता हुनेछ ।

जसमध्ये सबैभन्दा बढी ५१ वटा लगानीको प्रतिवद्धता चीनबाट आएको छ भने, बेलायतबाट २ वटा कम्पनी र ब्रिटिस भर्जिन आइल्यान्डबाट एउटा कम्पनीका लागि लगानीको प्रतिवद्धता आएको छ ।

प्रतिवद्धता अनुसार कार्य संचालन भएको खण्डमा यी सबै होटल तथा रेष्टुराँमा १५०० भन्दा बढिले रोजगारी पाउनेछन् ।