सिद्धार्थ राजमार्ग अन्तर्गत जिल्लाको भिरकोट नगरपालिका वडा नं १ बयरघारी दार्सिङमा शुक्रबार अपराह्न  स्कूल बसको ठक्करबाट मोटरसाइकलमा सवार २ जनाको मृत्यू भएको छ ।

वालिङबाट हेलु तर्फ जाँदै गरेको पाईनियर हाईएर एजुकेसन एकेडेमी स्कुलको ग. १ क. ४३७० नम्बरको बस र बिपरीत दिशाबाट आउँदै गरेको ग. १३ प. २८१४ नं. को मोटरसाईकल एक आपसमा ठक्कर खाँदा दुर्घटना भएको प्रहरीले जनाएको छ

प्रहरीका  अनुसार घाइते भएका दुवै जनालाई उपचारको लागि कालिका सामुदायिक अस्पताल हेलु लगिएको थियो ।

स्याङ्जाको भीरकोट–३ बानेथोक देउराली घर भई हाल कपिलवस्तु बस्ने ३१ वर्षीय ध्रुब भन्ने गुप्तबहादुर खत्री र भीरकोट–३ बानेथोक देउराली घर भई वालिङ नपा–१ रामबाच्छा बस्ने ५५ वर्षीय ढालबहादुर रानाको  कालिका सामुदायिक अस्पतालमा उपचारका क्रममा मृत्यु भएको हो ।

प्रहरीले बस चालक भीरकोट निवासी ५६ वर्षीय गंगाबहादुर गुरुङलाई नियन्त्रणमा लिइएको छ ।