पोखराको मनिपाल अस्पतालमा कोरोना संक्रमितको मृत्यु भएको छ । पोखरा महानगरपालिका वडा नं. ९ नयाँबजारका ७० वर्षीय पुरुषको मृत्यु भएको हो । उनको गएराति सवा ११ बजे उपचारकै क्रममा मृत्यु भएको गण्डकी स्वास्थ्य निर्देशनालयले जानकारी दिएको छ ।

भदौ २५ गते अस्पताल भर्ना भएका उनमा २८ गते कोरोना पुष्टि भएको थियो । स्वाब परीक्षणपश्चात पोजिटिभ नतिजा आएपछि उनको आइशोलेसनमा उपचार भइरहेको थियो । नेपाली सेनाको टोलीले शव व्यवस्थापन गर्ने प्रक्रिया अघि बढाएको बुझिएको छ ।

योसहित पोखरामा कोरोनाबाट मृत्यु हुनेको संख्या ८ पुगेको छ । कास्की जिल्लाभर १० जनाको मृत्यु भएको छ । अन्नपूर्ण गाउँपालिकाका एक र मादी गाउँपालिकाका एक जनाको ज्यान गएको छ ।

गण्डकी प्रदेशमा मृतकको संख्या ३१ पुगेको छ । मृत्यु हुनेमा कास्कीका १०, गोरखाका ६, नवलपुरका ५, तनहुँका ४, स्याङ्जाका ३, बागलुङ, म्याग्दी र लमजुङका १, १ जना छन् ।