पोखरा – गण्डकी प्रदेशमा शनिबार मात्रै ८३ जनामा कोरोना संक्रमण पुष्टि भएको छ ।

स्वास्थ्य निर्देशनालयको शनिबार प्रकाशित विज्ञप्ति अनुसार प्रदेशका ४ जिल्लाका ८३ जनामा कोरोना संक्रमण पुष्टि भएको हो । संक्रमितहरु कास्की, स्याङ्गजा, गोरखा र नवलपुरका छन् ।

पुष्टि भएका संक्रमित मध्ये सबैभन्दा धेरै नवलपुरका ४२ जना छन् भने, कास्कीका ३५, स्याङ्गजाका ५ र गोरखाका १ जना छन् ।

शनिबार बिहानको विज्ञप्ति अनुसार स्याङ्गजा पुतलीबजार नगरपालिका वडा नं -१ का ८५ वर्षीय पुरुषको कोरोना संक्रमणका कारण मृत्यु भएको छ ।

गत भाद्र २४ गते कोरोना पुष्टि भइ पश्चिमाञ्चल अस्पतालको आइसीयु कक्षमा उपचारत ती पुरुषको उपचारकै क्रममा आज बिहान ६:३२ बजेको समयमा मृत्यु भएको अस्पतालका निर्देशक डा. अर्जुन आचार्यले पुष्टि गरे । कोरोना संक्रमण भइ अस्पतालमा उपचारका क्रममा मृत्यु हुनेमा उनी दशौँ व्यक्ति भएको अस्पतालले जनाएको छ  ।

यस्तै निर्देशनालयको पहिलो विज्ञप्ति अनुसार प्रदेशमा थप ४५ जनामा कोरोना पुष्टि भएको छ । पुष्टि भएका संक्रमित मध्ये कास्कीका १०, गोरखाका १ र नवलपुरका ३४ जना छन् ।

कास्कीको पोखरा महानगरपालिका वडा नं ३ का ३० वर्षीया महिला, पोखरा ५ का ४५ वर्षीय पुरुष, पोखरा २८ का ४८ वर्षीय पुरुष, पोखरा ७ का २८ र २७ वर्षीय २ पुरुष र पोखरा १६ का ३४, १८ र १६ वर्षका पुरुष सहित १८ र २१ वर्षीया महिलाको परीक्षण रिपोर्ट पोजेटिभ आएको विज्ञप्तिमा उल्लेख छ  ।

यस्तै गोरखाको आरुघाट गाउँपालिका ८ का ३१ वर्षीया महिलामा पनि संक्रमण पुष्टि भएको छ  ।

उता नवलपुरको देवचुली नगरपालिकामा मात्रै ३४ जनामा संक्रमण पुष्टि भएको छ । देवचुलीको वडा नं ७, ४, १०, १४, ११, ८, ९ र वडा नखुलेको सहित ८ वटा पालिकाका ६ वर्षीया बालिका सहित ६५ वर्ष उमेर समुहका महिला र पुरुषमा कोरोना पुष्टि भएको निर्देशनालयको विज्ञप्तिमा उल्लेख छ ।

यस्तै सोही विज्ञप्तिमा पोखरामा मृत्युपछि एक महिलाको रिपोर्ट कोरोना पोजिटिभ आएको जनाइएको छ । बिहीबार राति कास्कीको माछापुच्छ्रे गाउँपालिका वडा नं. ३ घर भई हाल पोखरा महानगरपालिका–५ मालेपाटन बस्दै आएकी ४७ वर्षीया महिलाको शुक्रबार बिहानै अन्त्येष्टि गरिएकोमा आज रिपोर्ट पोजिटिभ आएको निर्देशनालयले जानकारी दिएको छ ।

लामो समय ब्लड क्यान्सरबाट पीडित उनी स्वास्थ्यमा समस्या भएपछि पोखरा गैह्रापाटनस्थित फिस्टेल अस्पतालमा तीन दिनअघि भर्ना भएकी थिइन् । बिहीबार बिहान कोरोना परीक्षणका लागि नमूना संकलन गरिएकोमा राति सवा १ बजे भेन्टिलेटरमा रहँदा ती महिलाको मृत्यु भएको थियो ।

अस्पतालले कोरोनाका कारणले नभई अन्य कारणले मृत्यु भएको जनाउँदै भोलिपल्ट बिहान परिवारजनलाई शव हस्तान्तरण गरेपछि परिवारले अन्त्येष्टि गरेका थिए ।

महिलाको अन्त्येष्टिमा ठूलो संख्यामा उपस्थिति रहेको थियो । पर्यटन व्यवसाय क्षेत्रमा संलग्न रहेकाले पनि दाहसंस्कारमा धेरैको उपस्थिति रहेको थियो । महाशाखाले मलामी गएका सबैजनालाई कम्तिमा पाँच दिन अनिवार्य रुपमा होम क्वारेन्टिनमा बस्न समेत आग्रह गरेको छ ।

यो, संगै गण्डकी प्रदेशमा कोरोना संक्रमणका कारण ज्यान गुमाउनेको संख्या २४ पुगेको छ ।

यस्तै निर्देशनालयद्वारा जारी दोस्रो विज्ञप्तिमा गण्डकीमा थप ३८ जनामा कोरोना संक्रमण पुष्टि भएको छ ।

पुष्टि भएका संक्रमित कास्कीमा २४, स्याङ्गजामा ५ र नवलपुरमा ८ जना छन् ।

कास्कीको पोखरा महानगरपालिकाका २४ जना संक्रमित मध्ये पोखरा १३ का २९ वर्षीय पुरुष, पोखरा १ का १८ र ३७ वर्षीया महिला, पोखरा १०    का ५७, २६, ३७ र ३८ वर्षीया महिला, पोखरा १२ का ५१, ४६, ४६, ३३, १०, ३४ र २७ वर्षीया महिला र १५ र ३५ वर्षका पुरुष, पोखरा १८ का १७ वर्षीया महिला, पोखरा २७ का १४ र ३७ वर्षीया महिला र १५, १६ र उमेर नखुलेका एक पुरुष, पोखरा २८ का ३७ वर्षीया महिला र वडा नखुलेको २५ वर्षीय पुरुषको परीक्षण रिपोर्ट पोजेटिभ आएको निर्देशनालयले जनाएको छ ।

यस्तै स्याङ्गजाको वालिङ नगरपालिकाका ५ संक्रमितहरु मध्ये वालिङ ८ का ३० वर्षीय पुरुष, वालिङ ६ का ३० वर्षीय पुरुष, वालिङ १ का ४० वर्षीय पुरुष, वालिङ ९ का ६५ वर्षीय पुरुष र वालिङ १ कै ६५ वर्षीया महिला रहेकी छन्  ।

यस्तै नवलपुरको बिनयत्रिबेणी नगरपालिकाका ३, ६ ,५ र ७ नं वडाका २२ देखि ६२ वर्ष उमेर समुहका महिला पुरुष गरी जम्मा ८ जनामा कोरोना पुष्टि भएको निर्देशनालयले जनाएको छ ।

संक्रमित सबै कन्ट्याक्ट ट्रेसिङका क्रममा पहिचान भएका हुन् । आज पुष्टि भएका ८३ जना सहित गण्डकीमा कूल कोरोना संक्रमितको संख्या २९०३ पुगेको छ ।