कास्की – कास्कीको रुपाकोटमा ढिस्को खसेर लेदो पहिरोले घर भत्किँदा एक किशोरीको मृत्यु भएको छ । रुपाकोट गाउँपालिका वडा नं. ६ स्थित काजी बिकको घर माथिको ढिस्को खसेर घर भत्किँदा घरमा सुतिरहेकी २० वर्षीया छोरी सृजना बिकको मृत्यु भएको कास्कीका प्रहरी नायव उपरीक्षक तथा प्रहरी प्रवक्ता सुवास हमालले जानकारी दिए ।

रुपा गाउँपालिका वडा नं. ६ का वडा अध्यक्ष नारायण गुरुङका अनुसार ढिस्को खसेर आएको पहिरोले घर भत्किँदा काजी विक सहित छोरी सृजना र छोरा सन्दिप सुतिरहेका थिए । सन्दिपले दिदी र बुबालाई उठाउँदा बुबा उठ्न भ्याए भने दिदी निन्द्रामा उठिनन् । सोहि बेला सिर्जनालाई पहिरोले पुरेकोमा स्थानीय, जप्रतिनिधी र सुरक्षाकर्मीको टोलीले उद्धार गरेको थियो ।

पहिरोमा परी गम्भीर घाइते भएकी छोरी सृजनालाई उपचारका लागि पश्चिमान्चल अस्पताल लगिएपनि उपचारकै क्रममा उनको मृत्यु भएको प्रवक्ता हमालले जानकारी दिए ।