फुटबलका सुपरस्टार लियोनल मेस्सी अन्ततः बार्सिलोना नै बस्ने भएका छन् । झण्डै दुई हप्ताअघि बार्सिलोनाबाट बाहिरिन चाहेको जानकारीसहितको आग्रह पत्र क्लबलाई बुझाएका मेस्सीले हाल आएर आफू स्पेनिस जाइन्टमै बस्ने बताएका हुन् ।

गोल डटकमलाई दिएको अन्तर्वार्ताको क्रममा मेस्सीले ‘हृदय टुटे’ पनि बार्सिलोनामै बस्ने निर्णय गर्नुको कारण विस्तृत रुपमा बताएका छन् । २० वर्ष बार्सिलोनामा रहेका मेस्सीले च्याम्पियन्स लिगको क्वाटर फाइनलमा बार्यन म्युनिखसँग ८–२ ले पराजित भएको ९ दिनपछि क्लब छोड्न चाहेको बताएका थिए ।

आफूलाई बार्सिलोनाबाट किन्नका लागि तिर्नु पर्ने ७०० मिलियन युरो तिर्न कुनै पनि क्लबले नसक्ने भएको तथा आफूले जीवन दिएको अति नै माया गर्ने क्लबविरुद्ध खेल्न नचाहेकाले बार्सिलोनामै बस्ने निर्णयमा पुगेको मेस्सीले बताएका छन् ।

३३ वर्षका मेस्सीले बार्सिलोना छोड्नका लागि फ्रि ट्रान्सफरको विकल्पमा छलफल गरे पनि त्यो सम्भव नभएको हो । उनले जुन १० सम्ममा जानकारी गएको भए स्वतन्त्र मूल्यमा क्लब छोड्न पाउने थिए ।

गोलसँग मेस्सीले भनेका छन्, ‘मलाई लागेको थियो कि बार्सिलोना छोड्न म स्वतन्त्र छु । मैले अध्यक्षलाई भनेको थिए । उनले जहिले पनि सिजनको अन्त्यमा मैले क्लबै रहने कि नहरने भनेर निर्णय लिन सक्ने बताए जहिले पनि र उनले अहिले आफ्नो सो वचन कायम गरेनन् ।’

उनले अघि भनेका छन्, ‘अब म बार्सिलोनामै बस्ने निर्णयमा पुगेको छु किनकी अध्यक्षले मलाई भने कि–क्लब छोड्नका लागि एक मात्र उपाय ७०० मिलियन युरो तिर्नु हो । र त्यो असम्भव छ ।’

बार्सिलोनासँगको मेस्सीको हालको सम्झौता आउँदो सिजन सकिने छ । मेस्सीले भनेका छन्, ‘म स्वतन्त्र मूल्यमा बाहिरिनका लागि जुन १० मा भन्नु पर्ने रहेछ, र उनीहरु मैले त्यो बेला किन भनिन भनेका छन् । तर अहिलेको कोरोना भाइरसको महामारीका बेला ला लिगा लगभग मध्यतिर मात्रै थियो ।’

‘क्लबबाट बाहिरिने अर्को उपाय अदालती प्रक्रिया पनि हो । तर म कहिल्यै पनि बार्सिलोनाविरुद्ध अदालत जाने छैन, मैले माया गरेको क्लब हो, जसलाई मैले आएदेखि आफ्नो सब चिज दिएको छु । ‘यो मेरो जीवनको क्लब हो, मैले यहिँ मेरो जीवन बनाएँ ।’

बार्सिलोना स्टार लुइस स्वारेज युभेन्टस जाने तयारीमा

बार्सिलोनाका स्टार खेलाडी लुइस स्वारेज भने इटालियन क्लब युभेन्टस जाने तयारीमा रहेको दाबी बिबिसीले गरेको छ । स्वारेज युभेन्टसमा अनुबन्धित हुन सहमत भएको उल्लेख छ ।

स्पेनिस जाइन्ट बार्सिलोनाबाट बाहिरिनका लागि सो क्लबलाई मनाउन सफल भएमा स्वारेज फ्रि ट्रान्सफरमा वा न्यून मूल्यमा युभेन्टस जाने दाबी बिबिसीको खबरमा छ ।

उरुग्वियन खेलाडी स्वारेजको बार्सिलोनासँगको हालको सम्झौता अझै एक वर्ष बाँकी छ । सन् २०१६ मा भएको सम्झौता अनुसार आउँदो सिजन ६० प्रतिशत खेलमा सहभागिता जनाएमा अर्को एक वर्ष थप हुनेछ ।

इटालियन पत्रिकाहरुका अनुसार स्वारेजले इटालीमा खेल्नका लागि नागरिकता सम्बन्धी परीक्षण पनि पास गर्नु पर्ने जनाएका छन् । दक्षिण अमेरिकी स्वारेजकी श्रीमती इटालियन हुन् ।