पोखरा । गण्डकी प्रदेशमा मंगलबार बिहान थप ३९ जनामा कोरोना सक्रमण पुष्टि भएको छ । जसमध्ये लमजुङ जिल्लामा मात्रै १४ दिनको नाबालकसहित २६ जनामा कोरोना पुष्टि भएको छ । प्रहरीको संख्या पनि थपिँदै छ भने पहिलो पटक महिला पत्रकारमा पनि कोरोना संक्रमण देखिएको छ ।

जिल्लाको बेसीसहर नगरपालिकाको लमजुङ जिल्ला सामुदायिक अस्पतालमा उपचाररत १४ दिने नाबालक सहित २६ जनालाई कोरोना संक्रमण पुष्टि भएको हो । सोही अस्पतालमा उपचाररत नाबालक सहित ५ जना, अस्पताल मै कार्यरत १ जनालाई कोरोना पुष्टि भएको छ । उपचाररत २८ वर्षीय महिला पत्रकार हुन् । ग्लोबल आइएमई बैंकमा कार्यरत ५ जना कर्मचारी, तथा नेपाल प्रहरीका ४ जनालाई कोरोना भाइरस पुष्टि भएको छ ।

यसैगरी, क्षयरोग उपचार केन्द्र पोखरामा गरिएको परीक्षणका क्रममा बेसीसहर नगरपालिका वडा नम्बर ७ का ८ जना महिला तथा ३ जना पुरुषलाई कोरोना संक्रमण पुष्टि भएको स्वास्थ्य निर्देशनालय गण्डकीले जानकारी दिएको छ ।

लमजुङमा ३ जना पत्रकारमा कोरोना लागिसकेको खुलेको छ । पत्रकार महासंघ लमजुङका अध्यक्ष आश गुरुङ, एक रेडियोमा कार्यरत पत्रकार र आज महिला पत्रकारमा कोरोना पुष्टि भएको हो ।

यस्तै, नवलपुर (ब.सु.पू) का १० जनालाई कोरोना भाइरस संक्रमण पुष्टि भएको छ । जिल्लाको विनयत्रिवेणी गाउँपालिका वडा नम्बर १ का ११ वर्षीया बालिका र २६ वर्षीय पुरुषलाई कोरोना भाइरस संक्रमण पुष्टि भएको हो । यस्तै, देवचुली १ का १ महिला तथा १ पुरुष सहित वडा नम्बर १६ का ३ महिलालाई कोरोना भाइरस संक्रमण पुष्टि भएको छ ।

यस्तै, बाग्लुङको बाग्लुङ नगरपालिका वडा नम्बर १० का २५ वर्षीय पुरुषलाई कोरोना संक्रमण पुष्टि भएको छ ।

पोखरा महानगरमा दुई जनामा कोरोना पुष्टि भएको छ । पोखरा ६ का ४५ वर्षीय पुरुष र पोखरा – १३ की २४ वर्षीया महिलामा कोरोना देखिएको हो । पोखरा – ६ मा संक्रमण पुष्टि हुने व्यक्ति पर्यटन व्यवसायी रहेको र उनी पोखराको चरक मेमोरियल हस्पिटलमा उपचाररत रहेको निर्देशनालयले जनाएको छ । पोखरा १३ की महिला भने होम आइसोलेसनमा रहेको निर्देशनालयले उल्लेख गरेको छ ।

यससंगै गण्डकी प्रदेशमा कोरोना संक्रमितको कुल संख्या २ हजार २ सय ५ पुगेको छ ।