तनहुँ । तनहुँको खैरेनीटार स्थित एक बैंकमा कार्यरत कर्मचारीमा कोरोना संक्रमण पुष्टि भएको छ । बैंक अफ काठमाडौं खैरेनीटार शाखामा कार्यरत एक जना महिला कर्मचारीलाई कोरोना सङ्क्रमण पुष्टि भएको हो ।

पोखरा महानगरपालिका–३० निवासी २७ वर्षीया महिलालाई संक्रमणको पुष्टी भएको स्वास्थ्य निर्देशनालय गण्डकीले जनाएको छ । संक्रमण पुष्टि भएको महिला कर्मचारी गत भदौ २ गतेसम्म बैंकना आएकी थिइन् ।

स्वास्थ्यमा समस्या आएपछि पोखरामा महिलाले गत भदौ ४ गते पीसीआर परीक्षणका लागि स्वाब दिएकी थिइन । हिजो शनिबार परीक्षणको नतिजा पोजिटिभ आएको हो । संक्रमित कर्मचारी पोखराबाटै स्कुटरमा कार्यालय आउजाउ गर्ने गर्थिन ।

बैंक अफ काठमाडौंको एटिएम सेवा समेत बन्द गरिएको छ । उनलाई संक्रमण पुष्टि भएपछि शुक्लागण्डकी क्षेत्रमा कन्ट्याक ट्रेसिङको काम शुरु भएको शुक्लागण्डकी नगरपालिकाका प्रवक्ता खिम कुमालले बताए ।

शनिबार ५९ जनाको स्वाब संकलन गरिएको प्रवक्ता कुमालले जानकारी दिए ।