किरण श्रेष्ठ, तनहुँ । तनहुँका तीन वटा स्थानीय तहले आफ्नो पालिका सिल गरेका छन् । जिल्लामा समुदाय स्तरमा कोभिड–१९ को संक्रमण बढ्दै गएपछि स्थानीय तहले सिल गर्ने घोषणा गरेका हुन् ।

जिल्लाको भानु नगरपालिका, बन्दिपुर गाउँपालिका र देवघाट गाउँपालिकाले सार्वजनिक सूचना जारी गरी सिल गर्ने घोषणा गरेका छन् ।

तनहुँमा कोरोना संक्रमण बढेको र समुदायमा संक्रमण देखिएकाले जिल्लाका ३ वटा स्थानीय तहले अत्यावश्यक सेवा बाहेकका सबै सेवा बन्द रहेको जनाएका छन् ।

आफ्ना पालिकावासीलाई सूचनामार्फत पालिकाले गरेको आग्रहलाई वेवास्था नगर्न अपिल गरेका छन् ।

जिल्लाको भानु नगरपालिकाले साउन २७ गते मंगलबार रातिदेखि नै सिल गरेको हो भने अन्य स्थानीय तहमध्ये देवघाट गाउँपालिकाले साउन २९ गते बिहिबारदेखि सिल गरेको हो ।

साउन ३० गते शुक्रबारदेखि बन्दिपुर गाउँपालिकाले पनि आफ्नो गाउँपालिकामा सिल गरेको जनाएको छ । तीन वटै पालिकाले १ हप्ता पालिका बन्द हुने जनाएको छ ।

सबै स्थानीय तहले आफ्ना नागरिकलाई सुरक्षित भई घरमै बस्न आग्रह समेत गरेका छन । अत्याबसेक काम बाहेक हिँडडुल नगर्न, अत्यावश्यक सेवा बाहेकका अन्य पसल व्यवसाय सञ्चालन नगर्न, यदि हिँडडुल गर्नै पर्ने भएमा र सेवा सञ्चालन गर्नुपर्ने भएमा सुरक्षा उपयका सुरक्षा सामग्रीको प्रयोग गर्दै सामाजिक दूरी कायम गर्न आग्रह गरेका छन् ।

जिल्लाको भानु नगरपालिकामा शुक्रबार र शनिबार गरी २२ जना कोरोना भाइरसका संक्रमित थपिएपछि जिल्लामा त्रास बढेको छ ।

सिल गरिएपछि औषधि पसल, तरकारी, खाद्यान्न, दूध बिक्री गर्ने पसल तथा अत्यावश्यक सेवाका बाहेक अन्य सबै पसल बन्द गर्न तीन वटै पालिकाले निर्देशन दिएको छ ।

जिल्लाको डुम्रे बजारमा पसल व्यवसाय भने बन्द भएको छ । अन्य स्थानिय तहको बजारमा भने मानिसको आवतजावत भने बढ्दो अवस्थामा रहेको छ ।

व्यापार व्यवसाय बन्द गरिए पनि लकडाउन प्रभावकारी कार्यान्वयन नहुँदा जोखिम झन बढ्दो अवस्थामा रहेको छ । केही व्यवसायीले लुकीछिपी व्यवसाय सञ्चालन गरेको भन्दै त्यसलाई रोक्न माग गरेका छन् ।

साथै चोक र सडकमा मानिस समूहमा जम्मा भई गफ गरेर समय बिताउनेको पनि जमात रहेको छ । स्थानीय तहले घोषणा गरेको सिलको प्रभावकारिता कस्तो छ भनेर सडकमा बुझ्न आउने पनि धेरै रहेका छन् ।

त्यस्तै अन्यावाश्यक बाहेक घर बाहिर ननिस्किन, सभा तथा सम्मेलन, भोजभतेर तथा खेलकुदका कार्यक्रम नगर्न पालिकहरुले अनुरोध गरेको छ ।

साथै घर बाहिर निस्कदा अनिवार्य मास्क लगाउन अनुरोध समेत विज्ञप्तिमा भनिएको छ । मास्क नलगाउनेलाई प्रतिव्यक्ति १०० रुपैयाँ जरिवाना समेत गरिने गाउँपालिकाले जनाएको छ ।

प्रशासनले जिल्लामा सिनेमा हल, पार्टी प्यालेस, व्यूटीपार्लर, शैलुन, डान्सबार, जीमखाना, स्वीमिङपुल सञ्चालन नगर्न तथा फुटपाथ तथा खुल्ला ठाउँमा ठेला, व्यापार, व्यवसाय नगर्न निर्देशन दिँदै आएको छ । तर यसको पूर्णपालना र अनुगमन हुन सकेको छैन ।

तनहुँमा संक्रमितको संख्या २१२ पुग्यो

तनहुँमा कोरोना संक्रमितको संख्या २१२ जना पुगेको छ । यस्तै गरी निको हुनेको संख्या १८० जना रहेका छन् । जिल्लाका ३२ जना संक्रमित आइसोलेसनमा रहेका छन् ।

समुदायमा कोरोना संक्रमण हुन थालेसंगै कन्ट्रयाक्ट ट्रेसिङको काम अघि बढाइएको जिल्ला स्वास्थ्य कार्यालय तनहुँका प्रमुख शंकरबाबु अधिकारीले बताए ।

जिल्लाको भानु नगरपालिका, बन्दिपुर गाउँपालिका र देवघाट गाउँपालिकामा समुदाय स्तरमा कोरोना संक्रमण देखिएको छ ।