धादिङ – अविरल वर्षाका कारण धादिङ र चितवन जिल्ला जोड्ने पृथ्वी राजमार्गको मौवा खोलाको पुल भत्किएको छ । आइतबार बेलुकीदेखि परेको अविरल वर्षापछिको बाढी र पहिरोका कारण धादिङतर्फको पुल भत्किएको प्रहरी नायब उपरीक्षक रुपक खड्काले जानकारी दिएका छन् ।

यो पुल भत्किएपछि पृथ्वीराजमार्ग हुँदै काठमाडौंसम्म हुने आवातजावत ठप्प भएको छ। चितवन र धादिङको सीमामा रहेको मौवा खोलाको पुल भाँचिएसँगै सवारी आवत जावत ठप्प भएको हो। बाढीले धादिङतर्फको पुलको भाग भत्काएको छ। धादिङमा पृथ्वीराजमार्गका आधा दर्जन भन्दा धेरै ठाउँमा पहिरो खसेर सडक पनि अवरुद्ध भएको छ। उता चितवनमा पनि ठाउँ ठाउँमा पहिरो झरेर सडक अवरुद्ध भएको छ।

यस्तै राजमार्गमा पर्ने हुग्दीखोला आसपास क्षेत्र, बादरेखोला, बैरेनी, चालिसे, फूर्केखोला, छहरेलगायत क्षेत्रमा राजमार्गभन्दा माथिबाट लेदो आएर थुप्रिएका कारण राजमार्ग अवरुद्ध भएको छ । पृथ्वी राजमार्ग र मलेखु धादिङ बेंसीको कालुपाण्डे राजमार्गको विभिन्न ठाउँमा खसेको पहिरोले राजमार्ग पूर्ण रुपमा बन्द भएको छ । पहिरोका कारण पृथ्वी राजमार्गको आवतजावत बन्द भएको छ ।