तनहुँ । तनहुँको पृथ्वी राजमार्ग अन्तर्गत डुम्रे दमौली सडकखण्डको बन्दिपुर १ नाहालामा ट्रक र कार एकआपसमा ठोक्किदा दुर्घटना भएको छ । उक्त दुर्घटनामा परी कार चालक सहित ३ जना घाइते भएका छन् ।

बन्दिपुरबाट पोखरा तर्फ जादै गरेको ग २ च ६१६९ नम्बरको कार र पोखराबाट डुम्रेतर्फ आउदै गरेको ना ४ ख १५८१ नम्बरको ट्रक नाहालामा एकआपसमा ठक्कर खादा उक्त दुर्घटना भएको हो ।

बुधबार बिहान भएको सडक दुर्घटनामा ३ जना घाइते भएकोमा कार चालक र अर्का एक जनाको अवस्था गम्भीर रहेको प्रहरीले जनाएको छ ।

दुर्घटनामा परी घाइते हुनेमा बन्दिपुर २ खहरेका वर्ष २३ का सुबास कुवर, वर्ष ४७ केहरसिह कुवर र वर्ष १८ सैलजा कुवर रहेका छन् ।

घाइतेको डुम्रे स्थित लक्ष्मी अस्पतालमा सामान्य उपचार पश्चात थप उपचारको लागि गम्भीर घाइतेहरु मध्य एक जनालाई पोखरा र अर्का एक जनालाई काठमाडौं पठाइएको इलाका प्रहरी कार्यालय भानुमुकाम डुम्रेले जनाएको छ ।

सामान्य घाइते सैलजा कुवरको लक्ष्मी अस्पताल डुम्रेमा उपचार भइरहेको छ । ट्रकका चालक डुम्रे प्रहरीको नियन्त्रणमा रहेको प्रहरी प्रमुख जितेन्द्र श्रेष्ठले बताए ।