देशका सातवटै प्रदेश सरकारले आर्थिक वर्ष ०७७/७८ को बजेट आज सार्वजनिक गरेको छ। प्रदेश सरकारहरुले दोस्रो पटक वार्षिक बजेट सार्वजनिक गरे । संविधानतः संघ सरकारले जेठ १५ मा बजेट घोषणा गरेको छ भने अन्तर सरकारी वित्त व्यवस्थापन ऐनले प्रदेश सरकारले असार १ मा बजेट सार्वजनिक गर्नुपर्ने उल्लेख गरेको छ।

प्रदेश सरकारहरूले आ-आफ्नो प्रदेशअनुरुप प्राथमिकता निर्धारण गरेर बजेट तयार पारेको जनाएका छन् । कोरोना भाइरस (कोभिड-१९) को महामारीका कारण यसपटकको बजेटले स्वास्थ्य तथा कृषि क्षेत्रलाई प्राथमिकतामा राख्ने प्रदेश सरकारका आर्थिक मामिला तथा योजना मन्त्रीहरूले जानकारी दिएका छन् ।

गण्डकी प्रदेश सरकारले आगामी आर्थिक वर्षका लागि ३४ अर्ब ८४ करोड २१ लाख ६० हजार रुपैयाँको बजेट सार्वजनिक गरेको छ । प्रदेशसभाको छैटौं अधिवेशनको १९ औं बैठकमा अर्थमन्त्री किरण गुरुङले चालु खर्चतर्फ १४ अर्ब ८४ करोड २६ लाख ८४ हजार विनियोजन गरिएको जनाए ।

यस्तै, पुँजीगत खर्चतर्फ १९ अर्ब ९९ करोड ९४ लाख ७६ हजार विनियोजन गरिएको छ भन वित्तीय सुधारका लागि ५० करोड छुटाइएको छ । यो बजेट चालू वर्षको भन्दा २ अर्ब ७० करोड, ७३ लाख ६८ हजारले बढि हो । गत वर्ष ३२ अर्ब १३ करोड ४७ लाख ९२ हजारको बजेट सार्वजनिक गरिएको थियो ।

आगामी आर्थिक वर्षको बजेटमा खर्च ब्यहोर्ने स्रोतमध्ये नेपाल सरकारबाट प्राप्त हुने वित्तीय समानीकरण अनुदान ७ अर्ब ११ करोड २६ लाख, ससर्त अनुदान ४ अर्ब ८४ लाख, समपूरनक अनुदान १ अर्ब ४९ करोड ६९ लाख, विशेष अनुदान ५४ करोड, राजस्व बाँडफाँडबाट प्राप्त हुने ७ अर्ब ५७ करोड ३७ लाख, रोयल्टीमार्फत ३० करोड, आन्तरिक राजस्वबाट प्राप्त हुने ४ अर्ब ६० करोड ८५ लाख रुपैयाँ अनुमान गरिएको छ ।

[wp-embedder-pack width=”100%” height=”400px” download=”all” download-text=”” attachment_id=”46238″ /]

कोरोनालाई लक्षित गरी झण्डै ३ अर्ब

गण्डकी प्रदेश सरकारले कोरोना भाइरस (कोभिड–१९) को रोकथाम, नियन्त्रण र उपचारलगायत कार्यक्रम लक्षित गर्दै २ अर्ब ९१ करोड ७६ लाख रुपैयाँ विनियोजन गरेको छ । अर्थमन्त्री गुरुङले गुणस्तरीय क्वारेन्टाइन निर्माण र संचालन, संक्रमितको उपचारका लागि विशेष अस्पताल र आइसोलेसन कक्षको स्थापना र सञ्चालन, सबै जिल्ला अस्पतालमा शय्या थप र सघन उपचार कक्ष स्थापना, पीसीआर परीक्षण औषधि उपकरण खरिद तथा कोषको लागि ६० करोड ४० लाख रुपैयाँ विनियोजन गरिएको जनाएका हुन् ।

कोरोना लक्षित हुनेगरी संघ र स्थानीय तहको साझेदारीमा व्यावसायिक तथा सीप विकास तालिम केन्द्रमार्फत तालिमका लागि १० करोड ५० लाख र प्राविधिक शिक्षा तथा व्यावसायिक तालिम केन्द्रमार्फत हुने तालिमका लागि ९ करोड ८९ लाख बजेट छुट्टाइएको छ । कृषितर्फ कोभिड–१९ लक्षित १८ करोड ५० लाख र पर्यटनतर्फ २ करोड ५ लाख छुट्टाइएको छ ।

व्यवसाय जीवन रक्षा कोषमा १ अर्ब 

गण्डकी प्रदेश सरकारले कोरोना महामारीबाट धरासयी हुनबाट उद्योग धन्दालाई जोगाउन १ अर्ब बजेट विनियोजन गरेको छ । मन्त्री गुरुङले व्यवसाय जीवन रक्षा कोषका लागि १ अर्ब विनियोजन गरेको जानकारी दिए ।

प्रदेश सरकारले निर्वाचन क्षेत्र पूर्वाधार विकास कार्यक्रमलाई निरन्तरता दिएको छ । कार्यक्रमलाई कोभिड–१९ को प्रभाव र असर न्यूनिकरण, पुँजी निर्माण तथा रोजगारी सिर्जना गर्ने पूर्वाधार विकासका योजना सञ्चालन गर्नेगरी निरन्तरता दिइएको मन्त्री गुरुङले बताए । आगामी आर्थिक बर्षका लागि अनुत्पादक क्षेत्रको खर्च कटौती समेत गरेको छ

गण्डकी विश्वविद्यालयलाई ४२ करोड ७५ लाख

प्रदेशले बनाउने गण्डकी विश्वविद्यालयका लागि ४२ करोड ७५ लाख रुपैयाँ विनियोजन पनि गरिएको छ । जलवायु कृषि कार्यक्रमलाई ४ करोड २६ लाख रुपैयाँ बजेट विनियोजन भएको छ । मुस्ताङ, मनाङमा स्याउ उत्पादन कार्यक्रम, एक बाली एक उत्पादन कार्यक्रमलाई निरन्तरता दिन बजेट छुट्याइएको छ ।

नेपाल ट्रस्टको नाममा रहेको पोखरा लेकसाइडस्थित हिमागृह र रत्नमन्दिरको संरक्षणका लागि बजेट विनियोजन गरेको गरिएको छ । समग्र प्रदेशको पर्यटन क्षेत्रको उत्थानका लागि २७ करोड ४५ लाख बजेट विनियोजन भएको छ ।

अहिले प्रदेशसभा सञ्चालन गरिरहेको पोखरा सभागृह मर्मतका लागि पोखरा महानगरपालिकासँगको समन्वयमा १ करोड रुपैयाँ विनियोजन गरेको मन्त्री गुरुङले जानकारी दिए ।

https://www.facebook.com/gandaknews/videos/328095304852504/