तनहुँ । कोरोना भाइरस (कोभिड—१९) संक्रमित व्यक्ति भेटिएको भन्दै अफवाह फैलाउने एक जनालाई प्रहरीले पक्राउ गरेको छ ।

सामाजिक सञ्जाल फेसबुकमार्फत तनहुँको दमौलीमा ३ जना कोरोना भाइरसका संक्रमित व्यक्ति भेटिएको गलत प्रचार गर्ने व्यक्तिलाई जिल्ला प्रहरी कार्यालय तनहुँले नियन्त्रणमा लिएको हो ।

तेह्रथुम जिल्ला म्याङ्गलुङ्ग नगरपालिका-७ स्थायी घर भई हाल व्यास-२ दमौली बस्दै आएका ३४ वर्षीय नवराज ढुङ्गानालाई शनिबार पक्राउ गरेको जिल्ला प्रहरी कार्यालय तनहुँका प्रमुख प्रहरी उपरीक्षक विनोद सिलवालले जानकारी दिए ।

ढुंगानालाई जिल्ला प्रहरी कार्यालय तनहुँले आइतबार ‘झुठा अफवाह फैलाउन नहुने’ शिर्षकमा मुद्दा दर्ता गरेको थियो ।

यस्तो छ ढुंगानाले फेसबुकमा राखेको कोरोना सम्बन्धि गलत पोष्ट :

आफ्नो फेसबुक आइडीमार्फत “तनहुँको दमौलीमा कोरोना संक्रमित ३ जना पुष्टि भएको छ.…. ” भनी पोष्ट गरेर आम नागरिक माझ सन्त्रास फैलाएको देखिएकाले आवश्यक कानुनी कारवाहीका लागि ढुंगानालाई जिल्ला प्रहरी कार्यालय तनहुँले नियन्त्रणमा लिएको प्रहरी प्रमुख सिलवालले बताए ।

जिल्ला प्रशासन कार्यालय तनहुँबाट १० दिनको म्याद थप गरि पक्राउ परेका ढुंगानामाथि थप अनुसन्धान भइरहेको जिल्ला प्रहरी कार्यालय तनहुँले जनाएको छ ।

तनहुँमा कोरोना संक्रमित भेटिएको छैन : स्वास्थ्य कार्यालय तनहुँ

तनहुँमा कोरोना भाइरसका संक्रमित नभटिएको जिल्ला स्वास्थ्य कार्यालय तनहुँले जनाएको छ । जिल्ला स्वास्थ्य कार्यालय तनहुँका प्रमुख शंकरबाबु अधिकारीका अनुसार तनहुँमा अहिलेसम्म कोरोना पुष्टि भएको छैन ।

अफवाह फैलाएर सर्वसाधारण आतङ्कित बनाउने काम नगर्न उनले अधिकारीले आग्रह गरेका छ्न ।

तनहुँमा अहिले सम्म विदेशबाट ८ सय ६२ जना आएको र र्‍यापिड डायग्नोस्टिक टेष्ट ६ सय ६८ (आरडिटि) गरिएकोमा सबैको रिपोर्ट नेगेटिभ आएको स्वास्थ्य प्रमुख अधिकारिले जानकारी दिए ।

पोलिमरेज चेन रियाक्सन टेष्ट (पिसीआर) विधिबाट भने अहिलेसम्म ३९ जनाको कोरोना परिक्षण गरिएको र सबैको रिपोर्ट नेगेटिभ आएको अधिकारीले जानकारी दिए ।