तनहुँ । झण्डै एक महिनादेखि जिल्ला प्रहरी कार्यालय, तनहुँको हिरासतमा रहेका लोकदोहोरी गायक प्रकाश कटुवाललाई अदालतले थुनामा राख्न आदेश दिएको छ । तनहुँ जिल्ला अदालतले शुक्रबार पुर्पक्षको लागि थुनामा पठाउने आदेश दिएको हो । गायक कटुवाल गत फागुन ५ गतेदेखि नै प्रहरी हिरासतमा छन् ।

गत फागुन २ गते तनहुँको डुम्रे स्थित डाँफे होटलका सञ्चालक लालकाजी गुरुङलाई अचेत हुने गरी टाउकोमा रड प्रहार गरेको घटनामा गायक कटुवालको संलग्नता रहेको भन्दै किटानी जाहेरी परेपछि उनी प्रहरी नियन्त्रणमा छन् । राति आफ्नै होटलमा बसिरहेको अवस्थामा मोटरसाइकलमा आएका नचिनेको व्यक्तिहरुले व्यवसायी गुरुङमाथि रड प्रहार गरेको थियो । गम्भीर घाइते भएका गुरुङको पोखरास्थित मनिपाल शिक्षण अस्पताल पश्चात् थप उपचारको लागि काठमाडौं स्थित अन्नपुर्ण न्यूरो अस्पतालमा लैजानुपरेको थियो ।

पोखरा जाने क्रममा गायक कटुवालकी श्रीमतीले डाँफे होटल अगाडि बान्ता गरेपछि सोही निहुँमा होटल सञ्चालक गुरुङ र गायक कटुवालबीच सामान्य भनाभन समेत भएको थियो । केही समय भनाभन भएपनि दुई पक्षबीच सहमती भई मिलापत्र समेत गरेर गायक पोखरा गएका थिए । सोहि दिन साँझ घरमा खाना खाई बसेका व्यवसायी गुरुङलाई मोटरसाईकलमा आएका दुई जना व्यक्तिले एक्कासी रडले आक्रमण गरेपछि सख्त घाईते भएका थिए ।

आक्रमणपछि व्यवसायी गुरुङको टाउकोमा गम्भिर चोट लागेको र अचेत अवस्थामा पुगेका थिए भने गुरुङकी श्रीमती समेतको हात भाँचिएको थियो ।

गायक प्रकाश कटवाल विवादित गायक हुन् । नायिका प्रियंका कार्कीको एयरपोर्ट काण्डबाट पनि उनी थप विवादित बनेका थिए । उनले अपाच्य शब्दमा तीज गीतका नाममा बजारमा सांगीतिक कोशेली प्रस्तुत गर्दै आएका छन् । यता पनि पिरलो, उता पनि पिरलो, चोरी खान पल्केको यो ढाडे बिरालो जस्ता गीत उनकै हो ।

डुम्रेका होटल व्यवसायी गुरुङमाथि रड प्रहार, गायक प्रकाश कटुवाल प्रहरी हिरासतमा