तनहुँ। अशक्त महिला बलात्कारको आरोपमा तनहुँमा एक युवक पक्राउ परेका छन् । ४२ वर्षीया महिलाको बलात्कारको आरोपमा तनहुँको भिमाद ३ का १९ वर्षीय शंकर विश्वकर्मा पक्राउ परेका हुन् ।

शारिरीक रुपले पूर्ण अशक्त रहेकी महिलाको बलात्कार गरेको आरोपमा उनलाई प्रहरीले शुक्रबार पक्राउ गरेको हो । घरमै बसिरहेका बेला महिलालाई विश्वकर्माले बलात्कार गरेको जिल्ला प्रहरी कार्यालय तनहुँका डिएसपि लिलाराज लामिछानेले जानकारी दिएका छन् ।

पीडित महिलालाई दमौली अस्पतालमा उपचार पछि डिस्चार्ज गरिएको लामिछानेले जानकारी दिए । विश्वकर्मालाई अदालत खुलेपछि अदालतमा हाजिर गराइने लामिछानेले बताए ।

अहिले तिहार बिदाका कारण अदालत बन्द रहेको र अदालत खुल्ने दिनमै अदालत लगिने लामिछानेले जानकारी दिएका हुन् । तनहुँमा यस आर्थिक वर्षमा बलात्कारका घटना बढिरहेको छ ।

यस आर्थिक वर्ष २०७६ -२०७७ को पहिलो चौमासिकमा मात्र बलात्कारका ६ वटा घटना प्रहरी समक्ष पुगेको छ । बलात्कारको ६ वटा घटनामा ७ जनालाई पक्राउ गरेको लामिछानेले जानकारी दिए ।