तनहुँ । तनहुँ उद्योग वाणिज्य संघको आयोजनामा सातौ तनहुँ महोत्सव हुने भएको छ ।

महोत्सव आगामी पौष २४  गतेदेखि माघ ६ गतेसम्म हुने तनहुँ उद्योग वाणिज्य संघका अध्यक्ष मानकाजी श्रेष्ठले बताए ।

महोत्सवको सहआयोजकमा तनहुँ उद्योग वाणिज्य संघ दमौली बजार एकाई रहेको छ । त्यस्तै प्रवर्द्धकमा नेपाल उद्योग वाणिज्य महासंघ, नेपाल पर्यटन बोर्ड, जिल्ला समन्वय समिति तनहुँ र व्यास नगरपालिका रहेको छ ।

“महोत्सव पैसा कमाउने उद्देश्यले मात्रै गर्न लागिएको होइन ‘ अध्यक्ष श्रेष्ठले भने ‘आगामी दिनमा नयाँ ठाउँमा महोत्सव गर्ने स्थानको व्यवस्थापन गर्न समेत हो ।’ बजार भित्र हाट बजार संचालन समेत गर्ने लक्ष्य संघले लिएको उनले बताए ।

महोत्सवमा १ सय ४० स्टल हुने आयोजकले जनाएको छ । ४ लाख दर्शकले महोत्सव अवलोकन गर्ने र ५  करोड बराबरको कारोबार हुने लक्ष्य आयोजकले लिएको छ । सातौ तनहुँ महोत्सवमा राष्ट्रिय तथा अन्तराष्ट्रिय व्यवसायीहरु सहित जिल्ला भित्रका कृषि, उद्योग, पर्यटन र सेवा क्षेत्रका स्टलहरु सहभागिता रहने आयोजकले अपेक्षा लिएको छ ।

महोत्सव व्यास-३ विपी वनवाटिकामा हुने आयोजकले जनाएको छ । विभिन्न जातजातिको मौलिक संस्कृतिलाई  बढी प्राथमिकता दिइने अध्यक्ष श्रेष्ठले बताए ।

जिल्लाको धार्मिक, जैविक एवं साँस्कृतिक विविधताको संरक्षण गरि समग्र आर्थिक तथा सामाजिक विकासका लागि उद्योज, व्यापार, शिक्षा, स्वास्थ्य, कृषि र पर्यटन क्षेत्रको प्रवर्द्धनमा टेवा पुर्याउदै विभिन्न जातजाति, वर्ग र समुदायको बीच सद्भाव एवं भातृत्व अभिवृद्धि गरि जिल्लाको आर्थिक एवम सामाजिक सम्मुनतिमा संगठित रुपले विकास गर्ने लक्ष्य महोत्सवले लिएको छ ।

स्थानिय बस्तु तथा सेवाहरुको बजार प्रवर्द्धनका साथै उद्दमी एवं व्यवसायीहरुलाई प्रोत्साहन गर्ने महोत्सवको उद्देश्य रहेको छ । नेपाल भ्रमण वर्ष २०२० लाई सफल पार्न सगयोगा गर्ने समेत आयोजकले जनाएका छन ।

महोत्सवमा कृषि प्रदर्शनी, हस्तकला प्रदर्शनी, साँस्कृतिक प्रदर्शनी, धार्मिक एवं ऐतिहासिक स्थलको प्रवर्द्धन, जलबिहार, सांस्कृतिक नमुना ग्राम भ्रमण लगाएत गतिविधि हुने आयोजकले जनाएको छ ।

कार्यक्रमको सभापतित्व संघका अध्यक्ष मानकाजी श्रेष्ठले गरेका थिए । पत्रकार सम्मेलन कार्यक्रममा संघका पुर्वअध्यक्ष एवं केन्द्रिय सदस्य देव कुमार श्रेष्ठ र पुर्व अध्यक्ष अशोक कुमार श्रेष्ठले बोलेका थिए । कार्यक्रमको संचालन संघका महासचिव इमकुमार मल्लले गरेका थिए ।