काठमाडौँ – आफूमाथि बलात्कार आरोपपछि सभामुख महरा परामर्शमा जुटेका छन् । सभामुख महरा मंगलबार बिहानैदेखि बलात्कार आरोप लागेपछिको अवस्था के गर्ने भन्नेबारे आफ्नै निवासमा पार्टीका निकट नेतासहितसँग परामर्शमा जुटेका हुन् ।

महराले कानूनविद, पार्टीका नेता तथा संसद सचिवालयका पदाधिकारीसँग छलफलमा जुटेको उनी निकट स्रोतले जानकारी दिएको छ । महराले सोमबार राति अबेर विज्ञप्ति निकालेर आफूमाथि लागेको आरोप पूर्ण रुपमा कपोलकल्पित र झुट रहेको दाबी गरेका छन् ।

महरामाथि बलात्कारको आरोप लागेपछि राजीनामा दिनु पर्ने दबाब बढेको छ । सत्तारुढ नेकपाकै नेताहरुले राजीनामा तथा निष्पक्ष छानबिनको माग गरेका छन् । यस्तै प्रमुख प्रतिपक्षी दल कांग्रेसका नेताहरुले पनि सत्य–तथ्य आउने गरी छानबिन हुनु पर्ने बताएका छन् ।

सभामुख महरामाथि एक महिला कर्मचारीले बलात्कारको आरोप लगाएकी छन् । मदिरा सेवन गरेर सभामुख महराले आफूमाथि बलात्कार गरेको ती महिलाको आरोप छ ।