जनकपुरधाम–   स्थानीय तह (गाउँपालिका र नगरपालिका)का कार्यलयमा आगजनी हुने घटना बढेपछि प्रहरीले स्थानीय तहका कार्यालयलाई केन्द्रित गरेर  बिहीबार बिहान साढे ३ बजेतिर प्रहरीको गस्ती टोली  सुरक्षा सतर्कता बढाएको थियो । उपमहानगरपालिकाको कार्यालय नजिक पुग्नेवित्तिकै प्रहरीको गस्ती टोली ‘अलर्ट’ भयो ।

उपमहानगरपालिकाको गेट नजिकै कसैले केही चिजमा ठोकेको जस्तो आवाज आइरहेको थियो । गस्ती टोलीको आकलन थियो– कसैले उपमहानगरपालिकाको कार्यालयमा आक्रमण गर्न लाग्यो ।

तर, गेट नजिक पुग्नेवित्तिकै प्रहरी टोलीको आकलनले फेल खायो । आक्रमण उपमहानगरपालिकामा हैन, बरु उपमहानगरपालिका कार्यालयको गेटसँगै रहेको फर्निचर पसलमा भएको रहेछ । उपनगरपालिकाको गेट अगाडि रहेको दिपक बजाज र अमित अग्रवालको जानकी फर्निसिङ (फर्निचर) हाउसको सटरको ताला तोडिएको देखियो । सटरको ताला तोडेकाहरु पसलको भित्रै थिए । उनीहरु पसलको सेफ पोडेर नगद निकाल्ने प्रयास गर्दै थिए । प्रहरीले चेतावनी दिन ९ एमएमको पेस्तोलबाट १ राउण्ड गोली चलायो । चोरीमा संलग्नमध्ये १ जना हात उठाउँदै प्रहरीतर्फ आए । गस्तीमा रहेकामध्ये २ जना प्रहरीले उनलाई नियन्त्रणमा लिए । प्रहरीको ध्यान हात उठाएर आएका व्यक्तितर्फ केन्द्रित भएको थियो– लुटपाटमा संलग्नमध्येका ३ जनाले प्रहरीतर्फ नै पेस्तोल ताके ।

१ जनाले पेस्तोल ताक्दै ‘ज्यादा होशियारी मत करना…’ भन्दै थिए । २ जना व्यक्ति त्यहाँबाट भाग्न खोजे । गस्तीमा रहेका प्रहरीले गोली ताक्ने व्यक्तिकै खुट्टामा गोली हानी दिए । प्रहरीको गोली लागेर पेस्तोल ताकिरहेका व्यक्ति भूइँमा ढले । भाग्न खोजेका अन्य २ जनालाई पक्राउ गर्न पनि प्रहरीले थप २ राउण्ड गोली चलायो । फर्निचर पसल तोडेर नगद लुटपाटमा संलग्न ४ जना नै पक्राउ परे ।

पक्राउ पर्नेमा भारतीय राज्य विहारको सितामढीको पिप्राढी इसलामपुर बस्ने ४७ वर्षीय मोहम्मद इलयास, सोही ठाउँका ३९ वर्षीय ओजिर अन्सारी, रौतहटको वृन्दावन नगरपालिका–१ रमौली बैरिया घर भएका ३५ वर्षी गगन पटेल र रौतहटको गौर नगरपालिका–४ का ४५ वर्षीय विनोद प्रसाद सिंह छन् । प्रहरीका अनुसार रौतहटको गौर घर भएका विनोदको खुट्टामा गोली लागेको छ । उनको जनकपुर अस्पतालमा उपचार भइरहेको छ ।

प्रहरीले उनीहरुको साथबाट कटुवा पेस्तोल १ थान र त्यसमा लाग्ने गोली २ राउण्ड बरामद गरेको छ । उनीहरुसँग ताल्चा काट्न प्रयोग हुने (कटर) १ थान र १ थान ‘ठूलो पेचकस’ पनि बरामद भएको छ ।

प्रहरीका अनुसार उनीहरुले फर्निचर पसलबाट लाखौं लुटपाट गर्ने योजना बनाएका भए पनि सफल हुन सकेनन् । नगद राखिएको सेफ फुटाउन नपाउँदै प्रहरीको टोली पुगेका कारण फर्निचर पसलको रकम जोगिएको छ । साथमा पेस्तोल बोकेर लाखौं लुट्ने योजनाका साथ हिँडेका उनीहरुको साथबाट नगदका रुपमा नेपाली रुपैयाँ १० का ७ नोट फेला परेका छन् । प्रहरीले पक्राउ परेका चारै जनामाथि संगठित अपराध, डाँका तथा चोरी र हातहतियार तथा खरखजना मुद्दामा अनुसन्धान प्रक्रिया अगाडि बढाएको छ ।