काठमाडौं–  एकैपटक चारजना शिशुहरूलाई खगित्रा शाहीले बुधवार जन्माएकी हुन् । ती शिशुहरु तीन जना छोरा र एकजना छोरी छन्। आठ महिनाको गर्भपछि शल्यक्रियामार्फत् ती शिशुहरू निकालिएका हुन् । शल्यक्रियामा संलग्न केएमसीका चिकित्सहरूले चम्ल्याहा बच्चा जन्मिनुलाई ‘दुर्लभ’ घटना भएको बताएका छन्। तीन जना शिशुहरूको स्वास्थ्य अवस्था सामान्य रहेको तर एकजनाको अवस्था भने अस्थिर रहेको अस्पताल स्रोतले जानकारी दिएको छ ।

केएमसीकी प्रसूति तथा स्त्रीरोग विशेषज्ञ डा चन्दा कार्कीले ३५ वर्षे अनुभवमा दोस्रो पटक चम्ल्याहा जन्म भएको देखेको बताइन् । यो निकै दुर्लभ अवस्था हो । उनले ‘टेस्टट्युब बेबी’का रूपमा जन्माइने सन्तानका हकमा भने एकभन्दा बढि बच्चाहरू गर्भमा रहन सक्ने बताइन । बुधबार जन्मिएका चम्ल्याहा शिशुहरुलाई विशेष स्वास्थ्य निगरानीमा राखिएको छ । सामान्यतः नवजात शिशु जन्मंदा साढे दुई किलो तौल हुनुपर्ने मानिन्छ।

चम्ल्याहा शिशुमध्ये सबैभन्दा कम एक जनाको तौल ९५० ग्राम छ भने बाँकी तीनको क्रमशः झण्डै १.४ केजी, १.५ केजी र १.६ केजी रहेको चिकित्सकहरूले बताएका छन्।