पोखराका दुई स्थानबाट जुवा खेल्ने र खेलाउने २५ जना पक्राउ परेका छन् । उनीहरुबाट प्रहरीले २ लाख ७३ हजार ४३ रुपैयाँ र केही थान तास समेत बरामद गरेको कास्की प्रहरीले जनाएको छ ।

जिल्ला प्रहरी कार्यालय कास्कीका प्रवक्ता एवं डिएसपी राजकुमार केसीका अनुसार पोखरा ३२ तल्लो गगनगौडास्थित जंगबहादुर पुनको घरमा प्रहरीले छापा मारेको थियो। घरधनी पुन सहित उक्त ठाउँबाट १९ जना पक्राउ परेको प्रवक्ता केसीले जानकारी दिए। उनीहरुबाट १ लाख ६ हजार ७ सय ४८ रुपैयाँ र ८ बुक तास प्रहरीले बरामद गरेको छ।

पोखरा ९ प्रगतिमार्गस्थित चन्द्रबहादुर गुरुङको घरमासमेत आइतबार प्रहरीले छापा मारेको थियो। घरधनी गुरुङसहित उक्त ठाउँबाट ६ जनालाई पक्राउ गरिएको प्रवक्ता केसीले बताए। उनीहरुबाट १ लाख ६६ हजार २ सय ९५ रुपैयाँ र ४ बुक तास प्रहरीले बरामद गरेको छ।

पक्राउ २५ जना विरुद्ध नै जुवा मुद्दामा म्याद थप अनुमति लिई कारवाही प्रक्रिया अघि बढाइएको छ।