पोखरा । नेपाली महिलाहरुको महान चाड हरितालिका तीजको अवसरमा पुष्पाञ्जली फेशन एण्ड इभेन्टले वाईवाई तीज मेला—२०७६ को आयोजना गर्ने गर्दैछ । पूरानो टुँडिखेल मैदान बगरमा भदौ ११ गतेदेखि १७ गतेसम्म रमाईलो मेला आयोजना हुने पुष्पाञ्जली फेशन एण्ड इभेन्टकी अध्यक्ष एवं कार्यक्रम संयोजक शोभा गौतमले जानकारी दिईन् । मेलाबाट संकलित रकम इन्द्रेणी एकेडेमीमा रहेका विद्यार्थीहरुको स्तरोन्नतिमा खर्च गर्ने बताइएको छ ।

एक हप्तासम्म चल्ने मेलामा मौलिक तीज प्रतियोगितालाई विशेष प्राथमिकताका साथ राखिएको छ । गौतमका अनुसार कार्यक्रम हुने स्थान विशेष महत्वको समेत छ । ‘दिदी—बहिनीहरु तीजको दिनमा ब्रत बस्ने र नजिकको सेती नदीमा गई स्नान गर्ने, तत्पश्चात टुँडीखेल मैदानमा बसी रातभरी आफ्ना विरहका गीत गाउने, नाच्ने र दुःख साटा—साट गर्ने थलो टुँडीखेल हो ।’ उनले भनिन् – ‘त्यसैले पनि यही ठाउँमा मेला गर्न लागेका हौँ । तीजमा धेरै दिदी बहिनीको सहभागिता हुनेमा हामी ढुक्क छौं ।’

तीज गीत प्रतियोगितामा प्रथम हुनेले नगद ३० हजार १ सय १, द्वितीय हुनेले २० हजार १ सय १ र तृतीय हुनेले १० हजार १सय १ पुरस्कार स्वरुप प्राप्त गर्नेछन् । सान्त्वना दुई टीमलाई समेत जनही ५ हजारको व्यवस्था गरिएको छ । एकल तीज गीत गृहणी नृत्य प्रतियोगिता अन्तर्गत प्रथम, द्वितीय, तृतीय र सान्त्वना हुनेले क्रमशः नगद १० हजार १ सय १, ७ हजार १ सय १, ५ हजार १ सय १ र ३ हजार १सय १ प्राप्त गर्नेछन् ।

एक हप्ते मेलामा म्यूजिकल चियर प्रतियोगिता, टपरी गाँस्ने प्रतियोगिता र छेलो फाल्ने प्रतियोगिता समेत राखिएको मेलाका मूल आयोजक समितिका सह—संयोजक एवम इन्द्रेणी एकिकृत विकास केन्द्रका अध्यक्ष भानुभक्त अधिकारीले बताए ।

मेलाभित्र महिला उद्यमीहरुद्वारा उत्पादित वस्तुहरुको प्रदर्शनी, विभिन्न व्यवसायीक स्टलहरु र मनोरञ्जनको निम्ति बाल उद्यानको समेत व्यवस्था रहेको मेलाका प्रचारप्रसार उपसमितिका संयोजक दिनेश शर्माले बताए । उनका अनुसार मेलामा राष्ट्रिय स्तरका कलाकारहरुको पनि बेजोड प्रस्तुति रहनेछ ।

मेलालाई थप व्यवस्थित र मर्यादित बनाउनको लागि मूल आयोजक समिति, कार्य सम्पादन समिति, महोत्सव संरक्षण समिति सँगै २२ ओटा विभिन्न उप—समितिहरु गठन गरिएको छ । मेला विगत २ं०३७ सालदेखि पोखरामा निरन्तर सामाजिक क्षेत्रमा क्रियाशिल गण्डकी प्रदेशकै अग्रणी संस्था इन्द्रेणी एकिकृत विकास केन्द्रको सहकार्यमा गर्न लागिएको हो ।