पोखरा । ‘एसपी, डिएसपी चिनेको छु, पैसा दिए छुटाउँछु’ भन्दै बार्गेनिङ गर्नेलाई पोखरामा प्रहरीले नियन्त्रणमा लिएको छ । आफू कुट्ने ३ जना प्रहरीले पक्राउ गरिसकेपछि कुट्नेका परिवारसँग साढे ३ लाख दिए छुटाउँछु नत्र एसपी डिएसपी चिनेको छु, ३ वर्ष थुनाउँछु भन्दै बार्गेनिङ गर्ने व्यक्ति उल्टै प्रहरी फन्दामा परेका हुन् ।

रकम बार्गेनिङ गरेको भन्दै कार्यालयमा उजुरी परेपछि जिल्ला प्रहरी कार्यालय कास्कीले पोखरा महानगरपालिका १८ बस्ने बिनोद बहादुर भट्टराईलाई नियन्त्रणमा लिएको हो । गत साउन १ मा ३ युवाले कुटपिट गरेको घटनालाई लिएर भट्टराईले प्रतिवादीको परिवारसंग सम्पर्क गरी ‘मैले एसपी, डिएसपी चिनेको छु मुद्दा मिलाउने भए ३ लाख ५० हजार देउ नत्र ३ वर्ष जेलमा बस्नु पर्ला’ भनि पटक पटक सम्पर्क गरेर रकम मागेपछि आफन्तहरुले प्रहरी कार्यालयमा आएर उजुरी दिएका थिए । पक्राउ परेका भट्टराईलाई कानुन अनुसार कारबाही प्रक्रिया अघि बढाउने प्रहरीले जनाएको छ ।