पोखरा । प्रजातन्त्र सेनानी दयाशंकर पालिखेको स्मृतिमा पालिखे परिवारजनले अग्रज पत्रकार रविन्द्रनाथ बास्तोलालाई पुरस्कारण अर्पण कार्यक्रममा वक्ता थिए नेकपा कास्कीका अध्यक्षं एवं गण्डकी प्रदेश सभा सदस्य कृष्ण थापा । कार्यक्रममा प्रमुख अतिथिका रुपमा निम्त्याइएका थिए नेपाली काँग्रेसका सभापति एवं पूर्व प्रधानमन्त्री शेरबहादुर देउवा । फरक पार्टीका देउवासामु थापाले आफू पोखराको मेयर हुँदादेखिका दुई घटना स्मरण गराए ।

दुवै प्रसंग पार्टी नहेरी आफू र आफ्नो पार्टीले गरेको प्रजातान्त्रिक व्यवहार सम्बन्धित थिए । मेयर भएका बेला आफूले कार्यालय उपलब्ध गराएर उदार बनेको कुरा सुनाए । त्यसपछि कार्यक्रम सम्बन्धित नै रहेर अर्को घटना पनि देउवासामु खुलस्त पारिदिए । एक त कार्यक्रम पोखरा उद्योग वाणिज्य संघको हलमै थियो, संघको एक संस्थापक दयाशंकर बाचुञ्जेल प्रजातन्त्रका लागि लडेका व्यक्ति थिए र विश्वशंकर दयाशंकरकै छोरा भएकाले पनि थापाले देउवासामू यो मौका चुकाएनन् । पालिखे परिवार काँग्रेस निकट हुन्, अझै नजिकमा देउवा निकट । उनले स्पष्टताका साथ भनिदिए – ‘पोखरा उद्योग वाणिज्य संघको अध्यक्षमा विश्वशंकरलाई जितायौं हामीले ।’

थापाले भने – ‘विश्वशंकरजी उद्योग वाणिज्य संघको चुनाव लड्ने कुरा गर्दै हुनुहुन्थ्यो , आएर भन्नुभयो ए थापाजी म कसरी यो कुरा भनौं, म दयाशंकरको छोरा, मेरो परिवार सिंगो प्रजातन्त्रको लागि होमिएको तर आज एउटा सामान्य उद्योग वाणिज्य संघको अध्यक्ष पनि आज मलाई यो पार्टीले पत्याएन । म के गरौं भनेर भन्नुभयो । उद्योग वाणिज्य संघको अध्यक्ष पार्टीले पत्याउनुपर्ने विषय होईन, एउटा साझा संस्था हो । सबैले पत्याए भने यसको अध्यक्ष हुन्छ । ल तपाईं अध्यक्ष बन्नुहोला भनेर हामीले उहाँलाई अध्यक्ष बनायौं ।’ थापाले यसो भनिरहँदा देउवा कहिले थापातिर हेर्थे, कहिले तलतिर हेर्थे ।

https://www.facebook.com/gandaknews/videos/2648339845178594/

त्यही कार्यक्रममा देउवाले ओली हिटलर शैलीमा अघि बढेको भन्नु अघि नै थापाले भनिसकेका थिए प्रजातान्तिक मूल्यमान्यता भाषणमा होइन, हाम्रा आचारण र व्यवहारमा देखिनुपर्छ । थापाले दुई घटना स्मरण गरेको प्रसंग पनि प्रजातान्त्रिक व्यवहारका सम्बन्धमै थियो ।

२०७३ साल भदौ ३१ र असोज १ गते भएको पोखरा उद्योग वाणिज्य संघको ३१ औं अधिवेशनमा विश्वशंकर पालिखे आफ्ना पाँच प्रतिष्पर्धीलाई पछि पार्दै अध्यक्ष चुनिएका थिए । जुनबेला तत्कालिन नेकपा एमालेको साथ पालिखेलाई थियो । एमाले निकट वर्तमान महासचिव दामु अधिकारी तत्कालित महासचिव बनाउने र अध्यक्षमा पालिखेलाई समर्थन गर्ने गोप्य सहमति थियो । पालिखेसँग अध्यक्ष पदमा भिडेका पाँच जना नै काँग्रेस निकटका थिए । त्यसैकारण पनि पार्टी चुपचाप अवस्थामा थियो । जसले जितेपनि काँग्रेस निकट नै हुने भएपछि कुनै कसरत नै गरिएको थिएन । देव क्षेत्री, नारायण कोइराला, ईश्वर कर्माचार्य, हिरा भट्टराई र धनीराम बराल अध्यक्ष पदमा भिडेका थिए । पालिखेले ९५५ मत ल्याएर विजयी हुँदा देव क्षेत्री ८००, नारायण कोईराला ४११, हिरा भट्टराई १६३, ईश्वर कर्माचार्य १२३ र धनिराम वराल ४४ मत ल्याएका थिए ।

खचाखच भरिएको पोखरा उद्योग वाणिज्य संघको हलमा केहीले थापाले काँग्रेसलाई भित्तैमा पुग्ने गरी भने है भन्दै साउती मारेको सुनिन्थ्यो ।