पोखरा । प्रतिकूल मौसमका कारण पोखरा विमानस्थलको सेवा अवरुद्ध भएको छ । मौसम बद्लीसँगै बाक्लो कुहिरोले भिजिविलिटी नपुग्दा विमान उड्न र ल्याण्ड हुन नसकेको विमानस्थलले जनाएको छ ।

पोखरा विमानस्थलका प्रशासन अधिकृत काशीनाथ पौडेलका अनुसार आज एउटा पनि जहाज उड्न सकेका छैनन् । मौसम नखुले आज विमान सेवा अवरुद्ध हुने उनले जनाए । उडान नहुँदा टिकट काटेर उड्न ठीक्क परेका यात्रु अलपत्र परेका छन्। पोखरा विमानस्थलबाट नेपाल एयरलाइन्स, बुद्ध, यती, सिम्रीक, तारा लगायतका एयरलाइन्सले दैनिक उडान भर्छन्।

मौसम सफा हुँदा विमानस्थलबाट सानाठूला गरी दैनिक ४० देखि ५० उडान हुने गरेका छन् । विमानस्थलबाट मंगलबार २५ उडान भएको थियो भने सोमबार २८ उडान भएको थियो । यो विमानस्थललाई राजधानी बाहिरको व्यस्त विमानस्थल मानिन्छ। पोखराबाट काठमाडौं, भरतपुर, जोमसोम, मनाङ, भैरहवालागयतका गन्तव्यमा उडान हुने गरेको छ ।