मोरङ – गत बैशाख ७ गते निर्वस्त्र अवस्थामा मृत फेला परेकी मोरङको पथरी शनिश्चरे नगरपालिकाकी २९ वर्षिया रिना बस्नेतको ९ दिनपछि दाहसंस्कार गरिएको छ ।

घटनाको अनुसन्धानलाई प्रभावकारी बनाउदै सत्यतथ्य पत्ता लगाउने सहमतिपछि आफन्त र परिवारका सदस्यले सुनसरीको चतराघाटमा आइतबार शवको अन्त्येष्टी गरेका हुन्।

उनी स्थानीय वीरबहादुर बस्नेतको घरको तीन तलामाथि १४ वर्षीय छोरासहित डेरा बस्दै आएकी थिइन् । वलात्कारपछि हत्या गरिएको र प्रहरीले घटनामा संलग्नलाई पक्राउ गर्न नसकेको भन्दै स्थानीय बासिन्दा आन्दोलित बनेका थिए ।

सोही आन्दोलनका कारण सोमबार र मंगलबार पथरी बजार नै तनावग्रस्त बनेको थियो ।  आन्दोलनकारीलाई नियन्त्रणमा लिनको लागि प्रहरीले २९ सेल अश्रुग्यास प्रहार समेत गरेको थियो । सोही प्रहारमा ५ जना घाइते भएका थिए ।

हत्यामा संलग्नलाई कारवाही हुनुपर्ने, शान्ति सुरक्षा कायम गर्नुपर्ने, महिला हिंसा बन्द गर्नुपर्ने लगायतका माग राखेर आन्दोलनमा उत्रिएका आन्दोलनकारीले शनिबार इलाका प्रहरी कार्यालय पथरी अगाडि धर्ना समेत दिएका थिए।