तनहुँ । तनहुँको दमौलीमा शुक्रबार देखि सर्वाधिक राशिको सेभेन ए साइड प्रथम खुल्ला क्लब स्तरिय पुरुष फुटबल प्रतियोगिता सुरु भएको छ ।

दोभान युवा क्लब व्यास-१ भादगाउँ दमौलीको आयोजनामा शुक्रबार देखि उक्त प्रतियोगिता सुरु भएको हो ।

प्रतियोगितामा प्रथम हुने टिमले १ लाख १५ हजार र दोस्रो हुने टिमले ५५ हजार ५५५ प्राप्त गर्नेछन । प्रतियोगितामा आयोजक सहित ३५ टिमको सहभागिता रहेको खेल संयोजक भोज बहादुर थापाले जानकारी दिए ।

त्यस्तै प्रतियोगितामा उत्कृष्ट खेलाडी, उत्कृष्ट गोलकर्ता, सर्वाधिक गोलकर्ता र अनुशासित टिमले क्रमशः २ हजार, ३ हजार ५ सय, ३ हजार ५ सय र ५ हजार प्राप्त गर्ने आयोजकले जानकारी दिएको छ ।

खेलकुदमा युवा लाई आकर्षित गर्न र भरपुर मनोरञ्जन गराउने उद्देश्यले प्रतियोगिताको आयोजना गरिएको दोभान युवा क्लबका अध्यक्ष नल बहादुर दरैले बताए ।

नेपाल फुटबलमा बामे सर्दै : पुर्वमन्त्री भण्डारी

नेपाल पनि फुटबलमा बामे सरिरहेको पुर्व बनमन्त्री एवं नेपाली काङ्ग्रेसका केन्द्रिय सदस्य शंकर भण्डारी बताए ।सो कुरा भण्डारीले उक्त फुटबल प्रतियोगिता उद्घाटन गर्दै बताएका हुन ।

पुर्वाधार अभावको बाबजुद नेपालका हरेक ठाँउका युवा फुटबलमा आकर्षित हुँदै गएको पुर्वमन्त्री भण्डारीले बताए ।

तनहुँ होनहार खेलाडीको धनि जिल्ला हो तर आवश्यक पुर्वाधारको कमिले लुकेर रहेको प्रतिभा राष्ट्रिय स्तरमा पुग्न नसकेको भण्डारीले बताए ।

अहिलेको दुई तिहाईको सरकार हरेक कुरामा पुर्ण असफल भएको काङ्ग्रेस केन्द्रिय सदस्य भण्डारीले आरोप लगाएका छ्न । कुनैपनि काम गर्ने क्रममा सरकार असफल भईरहेको भण्डारीले बताए ।

खेलमैदान व्यवस्थित बनाउने लक्ष्यमा व्यास नगरपालिकाले लागीपरेको व्यास नगरपालिकाका प्रमुख वैकुण्ठ न्यौपानेले बताए ।

खेलकुद मार्फत तनहुँ जिल्ला लाई चिनाउने खेलाडीहरु लाई सम्मान जिल्ला समन्वय समिति तनहुँ प्रमुख शान्ति रमण वाग्लेले बताए ।

कार्यक्रममा प्रमुख जिल्ला अधिकारी भरत शर्मा, जिसस उपप्रमुख पवित्रा पौडेल, नेपाली काङ्ग्रेस तनहुँका सचिव विश्व बास्तोला, व्यास-१ का वडाअध्यक्ष खर सिं दरै लगाएत आ आफ्नो शुभकामना मन्तव्य राखेका थिए ।

प्रतियोगिताको रेफ्रीमा ईन्द्र गुरुङ र बिजय राना रहेका छ्न ।

प्रतियोगिताको पहिलो उद्घाटन खेल आयोजक टिम सि र डाफे युवा क्लब फराकचौर बीच भएको थियो । उक्त खेलमा ३-१ गोलअन्तरले डाफे युवा क्लब फराकचौर बिजयी भएको छ ।

त्यसैगरि शनिबार भएको पहिलो खेल दोभान युवा क्लब ‘डि’ र निर्मल नगर बीच भएको खेलमा २–१ गोल अन्तरले निर्मलनगर विजयी भएको थियो ।

त्यस्तै दोस्रो खेल भीवाईसी ‘ए’ र रामथुम्की बीच भएको खेलमा ५–० गोल अन्तरले भीवाईसी ‘ए’ विजयी भएको थियो ।

त्यसैगरि तेस्रो खेल रिभरसाइड र सोतीपसल बीच भएको खेलमा ३–२ गोल अन्तरले रिभरसाइड विजयी भएको थियो ।

चौथो खेल जिल्ला प्रहरी कार्यालय तनहुँ र तजीलजी बीच भएको खेलमा २–० गोल अन्तरले जिल्ला प्रहरी कार्यालय तनहुँ विजयी भएको थियो ।