तनहुँ । तनहुँको म्याग्दे गाउँपालिका ६ सेराटारमा मासु काट्ने दाउ प्रहारबाट एक जना गम्भीर घाईते भएका छन् ।

सेराटार बस्ने अन्दाजी २५ वर्षीय सुनिल पराजुलीले सोही ठाउँ बस्ने ३३ वर्षीय बालकुमार श्रेष्ठलाई दाउ प्रहार गर्दा श्रेष्ठ गम्भीर घाईते भएका हुन् ।

पराजुलीले श्रेष्ठको टाउकोमा खुकुरी प्रहार गरी फरार रहेका छ्न । पराजुली लाई भगाउन सहयोग गर्ने ८ जना लाई पक्राउ गरेको जिल्ला प्रहरी कार्यालय तनहुँका प्रमुख एसपि सिद्धीविक्रम शाहले जानकारी दिए ।

“निकासी करको विषयमा विवाद भएको रैछ सोही विवादका कारण पराजुलीले श्रेष्ठलाई दाउ प्रहार गरेको अनुसन्धानका क्रममा बुझिएको छ ।”, प्रमुख शाहले भने ।

गाउँपालिकामा टेन्डर गर्दा बालकुमार श्रेष्ठलाई परेको टेन्डर आफुले पाउनुपर्ने भन्दै विवाद गर्दै पराजुलीले श्रेष्ठ माथी आक्रमण गरेको प्रहरी प्रमुख शाहले बताए ।

निज फरार पराजुलीको खोजतलास साथै घटनाको विषयमा थप अनुसन्धान भईरहेको प्रहरीले जनाएको छ । गम्भीर घाइते श्रेष्ठको काठमाडौ स्थित ग्राण्डि अस्पतालमा उपचार भईरहेको छ । श्रेष्ठ टाउको र खुट्टामा चोट लागेको छ ।