पोखरा । अहिले कन्सल्टेन्सीहरुमा जापानी भाषा पढनेको भिड छ । एउटै कारण, जापानमा कामदार भिषामा रोजगारीका लागि जाने युवा मोह । तर, जापान जाने बिषयमा कन्सल्टेन्सीहरुले गरेका हल्ला जस्तो जापानले नेपालबाट जस्तो सूकै कामदार पनि लैजाँदैन । स्रोतका अनुसार जापानले नेपालबाट श्रम सम्झौता गरेर पहिलो चरणमा दक्ष, सिप भएका र कम्तिमा भाषा ज्ञान भएका कामदार लिने प्रस्ताव गरेको छ ।

गत जनवरीमा काठमाडौंमा भएको नेपाल–जापान संयुक्त प्राविधिक समितिको बैठकमा नेपालले गरेको जापान सरकारले दक्ष नर्स र अनुभवी केयर गिभरमा लिने प्रस्तावमाथि जापानले एक किसिमको सहमति भइसकेको मन्त्रालयले जानकारी दिएको छ । नेपाल र जापान सरकारबीच सरकारीस्तरमा श्रम सम्झौता गरेर कामदार आपूर्ति गर्न विषय अन्तिम चरणमा पुगेको छ । सरकारी संयन्त्रमार्फत नै जापान रोजगारीका लागि नेपाली कामदार पठाउने गरि संरचना निर्माण र छलफल भइरहेको श्रम, रोजगार तथा सामाजिक सुरक्षा मन्त्रालयले जनाएको छ ।

भाषा परीक्षा र सिप परीक्षण, कामदार छनोटलागत अन्य विषयमा जापान सरकारसँग समझदारी भएपछि मात्रै कसरी श्रमिक आपूर्ति गर्न भने विषय प्रष्ट हुने छ । जापानले पठाएको प्रस्तावमा नेपाली कामदारलाई दिन सकिने सेवा सुविधाबारे पनि उल्लेख भएको श्रम मन्त्रालयको भनाइ छ ।

नेपालबाट नर्स र केयर गिभर प्रथामिकतामा

जापानले नर्सिङ, केयर गिभर, सुरक्षा गार्ड, उत्पादनमुलक उद्योग, सूचना प्रविधि, होटल, व्यबसाय, पर्यटन शिक्षा , कृषि, माछापालन, समुद्र, खाद्य लगायत क्षेत्रमा विदेशी कामदार आपूर्ति गदै आएको छ ।

जसमा सन २०१९ भित्र नेपालबाट नर्स र अन्य केही क्षेत्रमा दक्ष कामदार लिने जापान सरकारले प्रस्ताव गरेको श्रम मन्त्रालयले जनाएको  छ ।

कस्ता कामदार लिने भनेर जापान सरकारले प्रष्ट नखुलाएको मन्त्रालयले जानकारी दिएको छ । जापानको प्रथामिकतामा दक्ष र भाषामा ज्ञान भएका श्रमिक मात्र पर्ने मन्त्रालयको भनाइ छ ।

हल्लाका पछि नलाग्न  आग्रह

जापानको रोजगारी खुल्ने टुंगो नै नलागी शैक्षिक परार्मश केन्द्र (कन्सलटेन्सी) ले हल्ला फैलाएर भाषा अध्यापनका नाममा विद्यार्थीसँग मनपरी शुल्क लिन थालेका छन ।

जापानको रोजगारी नेपाली युवाहरुका लागि आर्कषक गन्तव्य मुलुक भन्दै विज्ञापन गरेर विकृति नै फलाइरहेका बेला श्रम मन्त्रालयले भने हल्लाको पछि लागेर नफस्न युवालाई आग्रह गरेको छ ।

विद्यार्थी भिसामा र कामदार भिसामा जाने नेपालीहरुले मासिक ३ देखि ४ लाख कमाइ गर्दै आएका छन । प्रतिव्यक्ति ४० हजारसम्म भाषा अध्ययनका नाममा केन्द्रले उठाउँदै आएका छन ।

जापान रोजगारीका लागि नेपाली श्रमिकहरु म्यानपारमार्फत लैजाने भन्दै यसअघि वैदेशिक रोजगार व्यबसायी संघले सूचना जारी गरेको थियो ।

यस्तो सूचना हल्ला मचाएर विकृति फैलाउन खोजेको मन्त्रालयले जनाएको छ । जापान सरकारसँग चरणबद्ध छलफल भइरहेकाले औपाचारिक निर्णय नभएसम्म हल्लाको पछि लागेर पैसा नफसाउन युवालाई मन्त्रालयले आग्रह गरेको छ । जापानले पाँच वर्षको अवधिमा तीन लाख ४५ हजार विदेशी कामदार लैजाने तयारी गरेको छ ।

जापानमा मागभन्दा धेरै रोजगारीका अवसर

सन २०१८ मा सार्वजनिक भएका समाचारहरुका अनुसार जापानमा औसतमा हरेक एक सय जना रोजगारीको खोजीमा रहेका व्यक्तिका लागि १ सय ६३ वटा रोजगारका अवसर हुने गरेका छन । यो संख्या सन १९७३ यताकै सबैभन्दा ठूलो अनुपात हो ।

विश्वकै तेस्रो ठूलो अर्थतन्त्र रहेको जापानमा बुढ्यौली उमेरका व्यक्तिको जनसंख्या बढ्दै गएपछि श्रमिकको अभाव भएको जापानको श्रम मन्त्रालयले जनाएको छ ।

हरेक एक सय जनाका लागि औसतमा १ सय ६३ वटा रोजगार उपलब्ध हुने गरेको जनाइएको छ । धेरै वर्षदेखि जापानको श्रम बजारमा कामदारको अभाव अनुभव हुन थालेको थियो । जापानमा हाल बुढ्यौली उमेरका व्यक्तिको जनसंख्या बढ्दैछ भने न्यून जन्मदरले पनि समस्या निम्त्याएको हो ।

रोजगारीका लागि जापान जानेलाई निरोगी स्वस्थ्य प्रमाणपत्र अनिवार्य

रोजगारीका लागि जापान जाने विदेशी नागरिकले निरोगिताको प्रमाणपत्र पेश गुर्नपर्ने भएको छ । जापान सरकारले आप्रवासी कामदारहरुका लागि निरोगिताको प्रमाणपत्र (मेडिकल सर्टिफिकेट) अनिवार्य पेश गर्नु पर्ने योजना ल्याएको छ ।

जापानको न्याय मन्त्रालयले विदेशी कामदारको हकमा यो नियम अनिवार्य गर्ने लागेको जनाएको छ । जापानमा काम गर्न जाने कामदारले उनीहरु काम गर्न सक्षम रहेको भन्ने सुनिश्चित गरिएको चिकित्सकको प्रमाणपत्र अनिवार्य रुपमा पेश गर्नुपर्ने नयाँ नियम पनि लागू हुने मन्त्रालयले जनाएको छ । सर्टिफिकेटलाई कामदारले जापानी अध्यागमन विभागमा नै बुझाउनु पर्ने छ ।

समाचार सन्दर्भ सामाग्रीः खबरहब