पोखरा, २५ फागुन । राष्ट्रिय खेलकुद परिषद्का सदस्य राजेश गुरुङले पोखरामा खेल पत्रकारहरुले खेलकुदका संघसंस्थाले गर्नुपर्ने काम गरेको भन्दै प्रशंसा गरेका छन् । उनले हरेक वर्ष नयाँ खेलाडीलाई प्राृत्साहन र खेलमा जिवन समर्पित गरेका खेलाडीहरुको सम्मानका लागि स्पोर्टस् अवार्ड गर्दै आएको स्मरण गर्दै यो काम खेल संघसंस्थाले गर्नुपर्नेमा पत्रकारले सहयोग मागेर भएपनि गरेको भन्दै धन्यवाद प्रकट गरे ।

नेपाल खेलकुद पत्रकार मञ्च गण्डकीको प्रथम अधिवेशनमा प्रमुख अतिथि राखेप सदस्य गुरुङले आफूले सक्दो सहयोग गर्ने प्रतिबद्धता पनि जनाए । अध्यक्षको आसनबाट मञ्च अध्यक्ष केशव पाठकले विगतको तुलनामा मञ्च बृहत् बन्दै गएको र यसले पोखरामा आयोजना गर्ने पोखरा स्पोर्टस् अवार्ड यहाँको थप चिनारी बनेको बताए । उनले कार्यकालमा सघाउने सम्पूर्णमा आभार व्यक्त गरे ।

यस्तै, संस्थापक अध्यक्ष समेत रहेका नेपाल पत्रकार महासंघका केन्द्रीय सदस्य रामकृष्ण ज्ञवाली, पत्रकार महासंघ गण्डकी प्रदेश अध्यक्ष त्रिभुवन पौडेल, पत्रकार महासंघ कास्की अध्यक्ष दीपेन्द्र श्रेष्ठ लगायतले शुभकामना मन्तव्य व्यक्त गरेका थिए ।

सो अवसरमा मञ्चले वेवसाइट लञ्च गरेको छ । www.nsjfgandaki.com तथा www.nsjfgandaki.org पत्रकार महासंघ केन्द्रीय सदस्य रामकृष्ण ज्ञवालीले लञ्च गरेका हुन् ।

पोखरा स्पोर्टस् लगायत महत्वपूर्ण इभेन्टका तस्वीर, भिडियो, कार्यसमिति तथा सदस्यको नामावली, प्रेस विज्ञप्ति, सूचना, प्रतिवेदन रहने छन् । साथै कसैले खेलसम्बन्धी समाचार पोष्ट गर्न सक्ने फिचर राखिएको महासचिव रञ्जन अधिकारीले जानकारी दिए ।

मञ्च उपाध्यक्ष दीननाथ बरालले स्वागत मन्तव्य राखेको कार्यक्रममा महासचिव रञ्जन अधिकारी संचालन गरेका थिए । बन्दसत्रले महासचिव अधिकारी र कोषाध्यक्ष विजय नेपालको कोषाध्यक्षको प्रतिवेदन पारित गर्यो । ०५७ सालमा स्थापित नेपाल खेलकुद पत्रकार मञ्च समन्वय समिति कास्की यस वर्ष गण्डकीको नाउँमा दर्ता भएको हो । अधिवेशनमा मञ्चका ५१ जना सदस्य प्रतिनिधि थिए ।

खेलकुद पत्रकार मञ्च गण्डकीमा गिरी निर्वाचित

पोखरा । नेपाल खेलकुद पत्रकार मञ्च, गण्डकीको अध्यक्षमा एकराज गिरी निर्वाचित भएका छन् । शनिबार भएको मञ्चको प्रथम अधिवेशनले गिरीको अध्यक्षतामा नयाँ कार्यसमिति निर्वाचित गरेको हो ।

गिरीले प्रतिष्पर्धी दिननाथ बराललाई १ मतले पराजित गरे । गिरीको पक्षमा २४ मत आयो भने बराललाई २३ जनाले मत दिए । एक मतपत्रमा दुवैलाई मत नदिएकाले बदर हुन पुगेको निर्वाचन समितिले जनाएको छ । कूल ५१ जना सदस्य रहेको मञ्चमा तीन जना अनुपस्थित थिए । गिरी पूर्व सचिव हुन् भने बराल निवर्तमान उपाध्यक्ष हुन् । अन्य पदाधिकारी र सदस्य निर्विरोध चुनिए ।

रञ्जन अधिकारी उपाध्यक्ष पदमा सर्वसम्मत भए । बिग एफएमका स्टेशन म्यानेजर, गण्डक न्यूजका सम्पादक अधिकारी कोषाध्यक्ष, सचिव, महासचिव हुँदै उपाध्यक्षमा चुनिएका हुन् । निवर्तमान कोषाध्यक्ष विजय नेपाल महासचिव, राजाराम पौडेल सचिव, शशी पौडेल कोषाध्यक्ष निर्विरोध चुनिए । तीन वर्षे कार्यकाल रहेको समितिका सदस्यहरुमा खुल्लातर्फ उमेश पुन, नारायण शाही र रोशन अधिकारी, दलिततर्फ शुशिल नेपाली, महिलातर्फ कविता घर्ती मगर, आदिवासी जनजातितर्फ गीता रानामगर चुनिए ।

खेलकुद पत्रकार मञ्च जिल्लाबाट प्रादेशिक स्तरमा रुपान्तरण भएको हो । रोचक के छ भने मञ्चको लगातार ३ अधिवेशनसम्म अध्यक्ष पद निर्वाचनमा मात्र १ मतअन्तर हुँदैआएको छ । यसअघि प्रेमनारायण न्यौपानेले सागरराज तिमिल्सिना र केशव पाठकले सन्देश श्रेष्ठलाई जित्दा प्रत्यासीसँग १ मतअन्तर परेको थियो ।

यसैबीच, निर्वाचित गिरीले आगामी दिनमा मञ्चलाई अझै बढाउन दत्तचित्त भै लाग्ने प्रतिबद्धता व्यक्त गरे । अध्यक्षका प्रत्यासी बरालले नयाँ कार्यसमितिको सफलताको कामना गर्दै सहयोग गर्ने सम्पूर्णमा आभार व्यक्त गरे ।

अधिवक्ता लीलाबल्लौ न्यौपाने संयोजक रहेको निर्वाचित समिति सदस्यमा पत्रकार महासंघ कास्की अध्यक्ष दीपेन्द्र श्रेष्ठ, जिल्ला खेलकुद विकास समितिका कार्यालय प्रमुख प्रकाश बराल र अधिवक्ता विष्णु अधिकारी थिए ।