काठमाडौं । कैलालीको टीकापुर घटनाको दोषि ठहरीएका रेशम चौधरील सहित ११ जनालाई जन्मकैद गर्नु अन्याय भएको भन्दै माइतीघरमा बिरोध प्रदर्शन गरिएको छ ।

थारु समुदायको आन्दोलनका क्रममा भएको घटनालाई राजनीतिक संवाद र सहमतिका आधारमा समाधान गरी अदातको जन्मकैद फैसला फिर्ता गर्न माग गर्दै शुक्रबार थारु समुदायले विरोध प्रदर्शन गरेका हुन् ।

थारु समुदायको आन्दोलनका क्रममा २०७२ साल भदौमा टीकापुरमा नेपाल प्रहरीको एसएसपी लक्ष्मण न्यौपानेसहित ७ जनाको मृत्यु भएको घटनामा कैलाली जिल्ला अदालतले रेशम चौधरीसहित ११ जनालाई जन्मकैदको फैसला सुनाउनु अन्याय भएको बिरोध कर्ताले तर्क गरेका छन् ।

टीकापुरमा थारु समुदायले गरेको आन्दोलनलाई राजनीतिक नभई आपराधिक घटनाको रुपमा ब्याख्या गरेर ११ जनालाई जेल हालेको भन्दै थारु कल्याणकारिणी सभालगायतका संस्थाले विरोध प्रदर्शन गरेका हुन् ।

प्रदर्शनमा सहभागीले थारुहरुमाथि दमन बन्द गर, थारु राजबन्दीहरुलाई तुरुन्त रिहा गर, थारु आन्दोलन राजनीतिक हो, आपराधिक होइन लगायतका नारा लेखेको प्लेकार्ड बोकेका थिए ।