पोखरा । मुलुककै प्रतिष्ठित फुटबल प्रतियोगिता आहा रारा गोल्ड कप यही फागुन ९ देखि सुरु हुँदैछ । फागुन १८ गतेसम्म सञ्चालन हुने १७ औं संस्करणको प्रतियोगितामा १० टीम सहभागी हुँदैछन् । प्रतियोगितामा २ विदेशी टीमको सहभागिता हुने आयोजक सहारा क्लबले जनाएको छ ।

प्रतियोगितामा विदेशी दुई टीम क्यामरुनको डफिन्स टीम फेम्ली फुटबल क्लब र भारतको सिक्किम युनाईटेड क्लब हो । क्यामरुनले गत साता मनकामना केबलकार पोखरा कपको उपाधि जितेको थियो । नेपालका तीन विभागिय टीम सशस्त्र प्रहरी बलको ए.पि.एफ.क्लब त्रिभुवन आर्मी क्लब र नेपाल पुलिस क्लब, लिग विजेता मनाङ्ग मर्याङ्गदी क्लब, नेपालका चर्चित क्लबहरु थ्रिस्टार क्लब, हिमालयन शेर्पा क्लब, संकटा क्लब र आयोजक सहारा क्लब पोखरा सहभागी हुने भएका छन् ।

एन्फाको कारण यस पटक प्रतियोगिताको अवधि १० दिनमा खुम्चिँदा १० वटा मात्र टिमको सहभागिता हुने भएको क्लबका अध्यक्ष केशव बहादुर थापाले बताए । क्याराभान गोल्ड कप सहित १७ औं संस्करणको फुटवल प्रतियोगिता गर्दासम्म १२ टीम रहेकोमा यस बर्ष भने १० टिमको मात्र सहभागिता हुने भएको हो ।

प्रतियोगितामा विजेताले उपाधि सहित ८ लाख एक हजार र उपविजेताले ४ लाख एक हजार साथमा ट्रफी मेडल प्रमाण पत्र प्राप्त गर्ने भएको छ । गत बर्षको तुलनामा यस बर्ष विजेतालाई एक लाख र उपबिजेतालाई ५० हजार पुरस्कार राषिमा वृद्धि गरिएको हो ।प्रतियोगितामा उत्कृष्ट हुने खेलाडीलाई स्कुटर पुरस्कार प्रदान गरिने भएको छ ।

प्रतियोगिताको अवधिमा सर्वोत्कृष्ट राष्ट्रिय फुटबल खेलाडी २०७५ बाट एक जनालाइ नगद ३५ हजारको साथमा सम्मान गनिरे भएको क्लबले जनाएको छ । हिमश्री फुड्स प्रालिको उत्पादन आहा तथा रारा तयारी चाउचाउको मुख्य प्रायोजनमा उक्त प्रतियोगिता हुन लागेको हो ।

यस अघि माघ २९ देखि फागुन ११ गतेसम्म आहा रारा गोल्ड कप हुने भनि एन्फा केन्द्रले खेल तालिका सार्वजनिक गरेको थियो । पोखरामा अर्काे फुटवल प्रतियोगिता एकै समयमा दुई दिनको अन्तरालमा हुने भए पछि क्लवले पुनः अर्को मितिमा उक्त प्रतियोगिता संचालनको लागि मिति माग गरेको थियो । मनकामना केबलकार पोखरा कप २०७५ यही माघ १५ देखि २७ गतेसम्म पोखरामा सम्पन्न भएको छ । गत बर्षको विजेता नेपाल पुलिस क्लब हो ।