किरण श्रेष्ठ, तनहुँ । न्यायिक बिचलन देखिएको भन्दै तनहुँ जिल्ला न्यायाधीश निलम्बनमा परेका छन् । तनहुँ जिल्ला अदालतका न्यायाधीश ओमकार उपाध्याय बुधबार निलम्बनमा परेका हुन् ।

आचरणविपरीत कार्यसम्पादन गरेको र पदीय कर्तव्यबाट च्यूत भएको आरोपमा न्यायपरिषद्ले उनीमाथि छानबिन समिति गठन गरेको थियो । उनि संगै ललितपुर जिल्ला अदालतका न्यायाधीश विश्वमंगल आत्रेय समेत निलम्बनमा परेका हुन् । समिति गठनलगत्तै उनीहरुलाई निलम्बन गरियो । न्यायिक बिचलन देखिएको भन्दै तनहुँका जिल्ला न्यायाधीश उपाध्यायलाई न्याय परिषदमा झिकाइएको थियो । उपाध्यायलाई विगतमा पनि परिषदमा झिकाएर सचेत गराइएको थियो। तर उनले आफ्नो आचारण सुधार नगरेको र पटकपटक परिषदमा गम्भीर उजुरी परेपछि उनी कारवाहीमा परेका हुन् । ओमकारको शैक्षिक प्रमाणपत्रमा कैफियत भेटिएको हो । यस्तै उनीबिरूद् आर्थिक लेनदेनको समेत आरोप थियो । उनको न्याय परिषद्ले अनुसन्धान गरिरहेको थियो ।

न्याय सम्पादनमा बदनियत देखिएपछि माघ पहिलो साता तानिएका तनहुँ जिल्ला न्यायाधीश ओमकार उपाध्याय निलम्बनमा परेका हुन् । त्यस्तै पुस २६ गते न्यायपरिषदमा तानिएका ललितपुर जिल्ला न्यायाधीश विश्वमंगल आत्रेय निलम्बनमा परेको न्यायपरिषद स्रोतले जनाएको छ ।

प्रधानन्यायाधीश चोलेन्द्रशमशेर राणाको निर्देशनमा दुवै न्यायाधीश तीन साताअघि परिषद्मा तानिएका थिए । न्यायपालिका शुद्धीकरणका लागि आक्रामक अभियान थालेका प्रधानन्यायाधीश चोलेन्द्र शमसेर जबराले दुईजना जिल्ला न्यायाधीशलाई निलम्बन गरेका छन् । न्याय परिषदमार्फत थालिएको यो अभियानका क्रममा अन्य दुई जिल्ला न्यायाधीशलाई एक हप्ते स्पष्टीकरण सोधिएको छ ।

न्यायाधीश आत्रेयले मलेसिया रोजगारीमा जाने कामदारको स्वास्थ्य परीक्षण गर्दा अवैध असुली गरेको भन्दै सरकारले कारवाही गरेका संस्थालाई सफाइ दिएपछि उनी विरुद्ध न्यायपरिषदमा समेत उजुरी परेको थियो । न्यायपरिषद सचिवालयले जिल्ला न्यायाधीशहरुमध्ये पहिलो बरियतामा रहेका सर्लाहीका राजेश काफ्ले र भक्तपुरका मोहम्मद जुनैद आजादलाई स्पष्टिकरण सोधेको छ ।

न्याय सम्पादनका क्रममा बद्नियत गरेको र न्यायिक बिचलन देखिएको भन्दै दुई जिल्ला न्यायाधीशलाई कारवाही किन नगर्ने भनेर एक साताभित्र लिखत स्पष्टीकरण मागेको छ । यसअघि न्यायपरिषदले ३८ किलो सुनकाण्डका अभियुक्तहरुलाई न्युन धरौटीमा छाड्ने उच्च अदालत विराटनगरका मुख्य न्यायाधीश कुलरत्न भुर्तेलसहित ५ जना न्यायाधीशलाई कारवाहीस्वरुप परिषदमा तानिएको थियो । उनीहरुमाथि पनि छानविन भइरहेको र दोषी देखिए निलम्बन गरिने प्रधान न्यायाधीश निकट स्रोतले जनाएको छ ।

प्रधान न्यायाधीशको कार्यभार सम्हाले लगत्तै राणाले न्यायाधीश उपर आउने गुनासा, टीका टिप्पणी सम्बन्धमा तत्काल सम्बोधन गर्ने गरि न्यायिक अनुगमन तथा निगरानी संयन्त्र बनाएका थिए । सो संयन्त्रबाट आवश्यक अनुगमन, निगरानी गर्ने, प्रतिवेदन लिने र आवश्यक प्रक्रिया अबलम्बन गर्ने राणाले बताएका थिए । निगरानी संयन्त्रले बिभिन्न न्यायाधीशहरुका उपर आएका गुनासा र उजुरीहरुको छानविन गर्ने क्रममा स्थलगत अनुगमन समेत गरेको स्रोतले जनाएको छ । संयन्त्रले सुक्ष्म अनुगमन, निगरानी र गुनासाहरुको सुनुवाइ गरेको थियो ।