नेपाल आइडलका कृशल कडेलका दाइ शंकर कडेलले नयाँ गीत युट्युब मार्फत सार्वजनिक गरेका छन् । विगत लामो समयदेखि जर्मनीमा रहेका शंकरले पूर्णिमा बोलको गीत मंगलबार मात्रै आफ्नो युट्युब च्यानलबाट सार्वजनिक गरेका हुन् ।

गीतको शब्द र संगीत राज खड्काको रहेको छ । यस गीत ल्याउनका लागि प्रेम नेपाली, अमृत शर्मा पौडेल लगायतको साथ रहेको छ । उनले गीत रुचाईएको खण्डमा म्युजिक भिडियो समेत तयार पार्ने जनाए ।

अध्ययनको सिलसिलामा जर्मनी रहेका शंकरले संगीत सम्बन्धी औपचारिक ज्ञान लिएका छैनन् । सानैदेखि गुनगुनाउने मात्र गरेका उनले आफ्नो रुची अनुसार पहिलो गीत सार्वजनिक गर्न पाउँदा खुशी लागेको बताए । ‘सानैदेखि गुनगुनाउँथे, तर कहिँपनि संगीत प्रशिक्षण लिने समय भएन । उच्च शिक्षाका लागि जर्मनी आएपछि झनै यो तारतम्य नै मिलेन ।’ – शंकरले भने – ‘आफ्नो स्वरमा गीत सुन्दा कस्तो हुन्छ जस्तो लागेको थियो, राज दाइको सहयोगले यहीं रेकर्ड गर्न पाएँ । आभार व्यक्त गर्दछु ।’

उनका भाइ कृशल कँडेल नेपाल आइडलमा टप एट सम्मको यात्रा तय गर्दा भोटिङका लागि शंकर निकै सक्रिय बनेका थिए । गायनमा आफ्नो ईच्छा भएकै कारण आफ्नो परिवार सांगीतिक क्षेत्रमा जमेको हेर्ने ठूलो रहर रहेको उनले सुनाए ।