पोखरा, २५ चैत । लागुऔषध नियन्त्रण व्युरो पोखराले लागुऔषध चरेश सहित २ जनालाई पोखराको जिरो किमिवाट पक्राउ गरेको छ ।

पक्राउ पर्नेमा बाग्लुङको तारा गाउँपालिका ४ का १९ वर्षिय विष्णु कडेल र वर्ष १८ का सुवास गौतम रहेका छन् । उनिहरुको साथवाट प्रहरीले ३ के।जि। चरेश बरामद गरेको हो ।

बागलुङबाट पोखराका विभिन्न स्थानमा प्रतिबन्धित लागुऔषध चरेस ल्याई विक्रिवितरण गर्दछन् भन्ने गोप्य सूचनाका आधारमा लागुऔषध नियन्त्रण व्यूरो पोखरावाट प्रहरी निरीक्षक रविन्द्रमान गुरुङको कमाण्डमा खटेको प्रहरी टोलिले उनिहरुलाई पक्राउ गरेको प्रहरीले जानकारी दिएको छ ।

यसअघि यही चैत्र २३ गते लागुऔषध नियन्त्रण व्यूरो पोखराले पोखराको घारीपाटनबाट दुई जनालाई गाजाँ र चरेस सहित पक्राउ गरेको थियो । उनिहरु संग कै सोधपुछका आधारमा आज निजहरुलाई पक्राउ गर्न सफल भएको लागूऔषध नियन्त्रण ब्यूरो पोखराका प्रमुख प्रहरी निरीक्षक गुरुङले बताए ।