गण्डक न्युज पोखरा, १२ चैत । पोखरामा सोमबार बिहानै ५ वर्षीया बालिकाको हत्या भएको कुरा सामाजिक सञ्जाल मार्फत बाहिरियो ।

दुई वर्ष अघि नेहा (योरुना) हत्या, बेगनास तालमा खिममाया पुनको शव भेटिएको प्रकरणले पोखरा तातेको थियो । सोहि प्रकृतिको घटना अनि देशैभर बलात्कार जस्तो जघन्य अपराधमा वृद्धि भईरहँदा धेरैले बलात्कार पछि हत्या भएको हुन सक्ने अनुमान गरे । तर प्रारम्भिक अनुसन्धानमा त्यस्तो नदेखिएको प्रहरीले स्पष्ट पारेको छ । बालिकाको पोस्टमार्टम हुन बाँकी नै छ ।

यही गाडी अगाडि बच्चा छोपेर लुकाइएको थियो ।

पोखराको नयाँबजारमा ५ बर्षिया बालिका बिहानी रोक्का मगरको आईतबार राति १४ वर्षीय पुन थरका एक बालकले हत्या गरे । खेलौनाकै विषयमा विवाद भएको ढुंगाले टाउकोमा हान्दा रगत बगेकाले बोराले घाँटी च्यापेर मारेको बयान अभियुक्तले दिएका छन् ।

प्रहरी नियन्त्रणमा पुगेपछि अभियुक्त बालक आत्तिएको प्रहरी स्रोतले जनाएको छ । सोमबार बिहान गण्डकन्युजको टीम जिल्ला प्रहरी कार्यालय कास्की पुगेर घटनाबारे जानकारी लिँदा प्रहरी प्रमुख एसपी अशोक सिंहले बलात्कार भएको केहि कुनै प्रमाण फेला नपरेको बताए । उनले बालकले बयानका क्रममा पनि खेलौनाकै विषयमा विवाद हुँदा ढुंगा प्रहार गरेपछि मृत्यु भएको जनाए ।

प्रहरी स्रोतका अनुसार अभियुक्तले दिएको बयान यस्तो छ:

‘म त्यही गाडी धुने काम गर्छु । म १४ वर्षको भएँ । मेरो घर छैन । बुबा आमा पनि छैन । मेरो रिमोट गाडी थियो । खेल्दा उसले बिगारेर नदिएपछि मैले ढुंगाले हानेको हो । ढुंगाले हानेपछि टाउकोबाट रगत आयो र रुन कराउन लाग्यो । उसको ममीले मलाई मार्छ भनेर बोराले घाँटी कसेर मारेँ । अनि आएर ग्यारेजको गाडी मुनी आएर सुतेँ । मलाई उनीहरुले फेला पार्यो ।’

मृतक बालिकाको घरमा पुगेर बालिकाकी आमा भेटेपछि अभियुुक्त पुन काम गर्ने ग्यारेजमा पुग्दा अभियुक्त काम गर्ने निट एण्ड क्लिन सर्भिस प्वाईन्टमा बाहिर गेट बन्द थियो । भित्र पस्दा संचालक टेक बहादुर गुरुङकी आमा, एक छिमेकी, गाडी धुने काम गर्ने दुई महिला र सञ्चालक गुरुङकी मंगोलियन पत्नी मात्र थिए । सञ्चालक गुरुङलाई जिल्ला प्रहरी कार्यालय कास्कीमा लगिएको उनकी पत्नीले बताईन् ।

आठ वर्ष अघि नेपाल आएकी गुरुङकी पत्नी एरेका बल्ल बल्ल नेपाली बोल्न सक्ने रहेछन् । छिमेकी, उनकी आमा र एरेकाले अभियुक्त पुनबारे जानकारी गराए । एरेकाले भनिन्ः

‘त्यो केटा एक महिना एक हप्ता पनि भएको थिएन यहाँ काम गरेको । सधैं गाडी धुन आउने ट्याक्सी ड्राइभरले एउटा दुःख पाएको फुच्चे छ । काम पनि राम्रो गर्छ । ६ दिन मैले नै मेरो घरमा राखेँ अब काममा लगाउनुपर्यो भनेपछि काममा राखेको हो । दुःख पायो भनेर काममा राखेको । अर्को टेक मगर भन्ने पनि छ । त्यो पनि ३ महिना जति भयो । २ जना सँगै काम गर्थे । यहीं कोठामा सुत्थे । टिभी राखिदिएको छु । यति राम्रो सुत्ने ठाउँ छ । माया गरेर राखेको हो । हिजो दुई जना मिलेर रक्सी खाएछन् । अनि यस्तो भयो । कपडाहरु यही हो सबै बाहिर निकालिदिएँ ।’

ग्यारेजमै रहेकी एक छिमेकीले आफ्नो छोरा पनि केटाहरु सुत्ने कोठामै टिभी हेरिरहँदा पुन चाहिँ खाना नै नखाई बाहिर निस्केको । टेक चाहिँ टिभी हेर्दै भात खाईरहेको जानकारी दिईन् । ‘साईकल पनि छैन । त्यो केटा पनि छैन । दुई जना रक्सी खाए । त्यो चाहिँ चाँडै भात पनि नखाई हिँड्यो । पछि बच्चा हरायो भन्ने भयो । सबैले खोज्न थाले । टेके पनि सँगै खोज्न थाल्यो । यस्तो गरेछ ।’

अभियुक्तलाई चिनेजानेका जति सोझो र हाँसिरहने स्वभावको रहेको बताउँछन् । ‘सानो थियो, कोहिसँग बोल्थेन । राम्रो गोरो थियो । अनाथ भन्थे सबैले । उसले आफ्नो डायरी लेख्ने गरेको थियो रे । आफूले थाहा पाएदेखि भोगेको कुरा सबै लेखेको भन्ने सुनेको थिएँ । स्याङ्जामा अंकल अण्टीकहाँ बस्दा हेला गरेर पोखरा आएको भन्थे ।’ – नजिकै बस्ने किसान कार्कीले सुनाए ।’

प्रहरीले उनले लेखेको डायरी र बच्चा मारेपछि रगत लागेको कपडा समेत बरामद गरेको जनाएको छ । प्रहरी स्रोतका अनुसार डायरीमा मायाका कुराहरु समेत छन् ।

अघिल्लो समाचार:

५ बर्षिया बालिका हत्या प्रकरणः के भन्छिन् आमा बिना ?

बालिकाकी आमा बिना ओछ्यानमा लडिरहेकी थिईन् । उनी बोल्ने अवस्थामा थिईनन् । एकछिनपछि घटनाको बारेमा छिमेकीहरुले भन्न सुरु गरेपछि उनी केहि सम्हालिन् र घटनाबारे यसरी बेलिबिस्तार लाईन् । :-

“मेरो श्रीमान आर्मी हुनुहुन्छ । नवलपरासीमा हुनुहुन्छ । एउटा छोरा र छोरी मात्रै हो । छोरा शरद ९ वर्षको भयो । छोरी बिहानी ५ पुरा भएकी थिईन् । म पोखरा २ वर्ष अघि आएको हो । पहिले अमरसिंहमा बस्थेँ । त्यहाँ पनि ६ महिनाजति खाजा घर चलाएँ । स्कुल नजिक भएकाले बाबु नानीलाई त्यहीँ पढाएँ । यता नयाँबजार आएको १ वर्ष बढी भयो ।

हिजो (आईतबार) बेलुकी पनि बाहिर पेटीतिर खेलिरहेकी थिईन् । मकहाँ महिनाबारी खाना खानेहरु छन् । म खाना बनाउँदै थिएँ । ७ बजेतिरबाट नानी देखिएन, अबेरसम्म नआएपछि उसको दाइले त्यो केटा र नानी खेलिरहेको भन्यो ।

त्यो केटा काम गर्ने ठाउँमै सुत्थ्यो । (अभियुक्त ठीक अगाडिको निट एण्ड क्लिन सर्भिस प्वाईन्टमा गाडी धुने काम गर्दै आएका थिए) त्यहाँ पुग्दा त्यो केटा रहेनछ । त्यसपछि सबै ठाउँमा खोज्न थाल्यौं । सधैं कोठामै सुत्थ्यो, रहेनछ । पुलिसलाई खबर गरिसकेका थियौं । २० मिनेट जतिमा पुलिस आयो । केटालाई उसकै काम गर्ने ठाउँमा राखिएको गाडी मुनि भेटियो । उसले मैले मारेँ भन्यो । म नानीलाई हेर्न पनि पाईनँ । पुलिसले नै सबै लग्यो । नानीबाबुका बुबा आउँदै हुनुहुन्छ ।

खेलौना नदिएर भनेको छ अरे । खेलौनाकै कारण त्यत्रो ठूलो मान्छेले बच्चा मार्छ ? अनाथ भनेको छ । १४ वर्ष नै भयो भन्ने के छ ? ठूलो पनि हुन सक्छ उमेरमा । त्यसरी मारेर, कसरी लुकाउने भनेर जानेको मान्छे बालक हुन्छ ? एकदमै गहिरो गरि छानविन हुनुपर्छ । मेरी छोरी मार्नेलाई कडा कारबाही हुनुपर्छ ।”

यति भनेपछि मृतककी आमा बिना बोल्न सकिनन् । उनले पानी समेत खाएकी छैनन् ।

सम्बन्धित समाचार

पोखरामा ५ वर्षीया बालिका ‘बिहानी’ को हत्या