गण्डक न्युज पोखरा, १८ फागुन / पोखरा लेखनाथ महानगरपालिका वडा नं. १८, गुफाडाँडा एक महिला मृत फेला परेकी छन् । स्थानीय जंगल बीचमा रहेको एक टिनको छाप्रोमा सडेगलेको अवस्थामा भेटिएको महिलाको सनाखत हुन सकेको छैन ।

शुक्रबार बिहान साढे ८ बजे स्थानीयले प्रहरीलाई खबर गरेपछि वडा प्रहरी कार्यालय बैदामबाट टोली गएको कार्यालय प्रमुख डिएसपी नविन कार्कीले गण्डक न्युजलाई जानकारी दिए । उनका अनुसार शव चिन्न नसक्ने गरी गलिसकेको छ ।

स्थानीयलाई उद्दृत गर्दै डिएसपी कार्कीले भने – ‘गुफा डाडाँ जंगलमा रेस्टुरेन्ट खोल्ने उद्देश्यले बनाएको टहरो रहेछ । दुई कोठे टीनको टहरोमा गन्ध आएपछि स्थानीयले खबर गरे । ’ शवलाई पश्चिमाञ्चल क्षेत्रीय अस्पतालको शवगृहमा राखिएको छ ।

स्थानीयले गाउँमा मागी हिँड्ने, मानसिक सन्तुलन गुमाएकी महिला आएको बताएका छन् । महिलाको कपडा समेत त्यस्तै प्रकृतिको रहेकाले सोहि महिला हुनसक्ने अनुमान गरिएको छ ।

अहिलेसम्म नाम थर वतन नखुलेकी महिलाबारे अनुसन्धान भईरहेको प्रहरीले जनाएको । छ ।