रञ्जन अधिकारी पोखरा, १३ माघ / तनावपूर्ण खेलमा सुदुरपश्चिम स्पोर्टिङ क्लब विरुद्ध २–१ गोलको जीत निकाल्दै पाहुना टोली उत्तर बरिन्धरा क्लब १६ औं आहा ! रारा गोल्डकपको सेमिफाईनलमा प्रवेश गरेको छ । अन्तिम समयमा एक पछि अर्को खेलाडी गुमाएको बरिन्धरालाई आगामी खेलमा असर पर्नेछ । अब बरिन्धराले माघ १५ गते हुने नेपाल पुलिस र थ्रीस्टार क्लबबीचको खेलको विजेतासँग माघ १७ गते खेल्नेछ ।

पोखरा रंगशालामा भएको निकै प्रतिष्पर्धात्मक खेलमा ७४ औं मिनेटमा मिडो मासाले गोल गर्दै बंगलादेशलाई अग्रता दिलाएका थिए । म्यान अफ दि म्याच समेत रहेका उनले सिल्ला सोन्लेमेनको पासमा फष्र्ट बार च्याप्दै गोल गरेका हुन् । चार मिनेटपछि नै सुदुरपश्चिमले बराबरी गर्ने मौका गुमाएपछि खेलमा नतिजा नै उल्टिएको हो । बंगलादेशका जिन्टु मोहम्मदले डिबक्स भित्र फाउल गरेपछि रेफ्री सुदीश पाण्डेले सुदुरपश्चिमलाई पेनाल्टी दिएका थिए । तर सब्स्टिच्युट खेलाडी पोखराकै धिरज गुरुङ पेनाल्टीमा चुके । गुरुङले किपरको दायाँ साइड च्यापेर गरेर फितलो प्रहार बंगलादेशका गोलकिपर ओसमान गोनीले सहजै नियन्त्रणमा लिए ।

त्यसपछि दबाबमा रहेको सुदुरपश्चिम विरुद्ध बरिन्धराले ८३ औं मिनेटमा अग्रता दोब्बर बनायो । पहिलो गोलका सहयोगी सिल्ला सोन्लेमेनले दोश्रो गरेका हुन् । विपक्षी डिफेन्सको कमजोरीको फाइदा उठाउँदै उनले मोनिर आलमको पासमा बललाई सिधै जाली चुमाए ।

सुदूर पश्चिमका लागि ८८ औं मिनेटमा विनोद केसीले सान्त्वना गोल गरे । पेनाल्टी बक्स भित्रबाट मनिराम चौधरीले निकालिदिएको पासमा बिपक्षी रक्षकलाई छलाएर उनले गोल गरेका थिए । खेलमा सुदुरपश्चिम हावी रह्यो तर स्कोर गर्ने आधा दर्जन बढी मौका गुमाउँदा यसपटक दोस्रो खेलबाटै बाहिरन बाध्य भएको हो । सुदूर पश्चिमले खेलको पाँचौं मिनेटदेखि नै गोल गर्ने मौका गुमाएको थियो ।

एकै खेलमा १० कार्ड

सम्भवतः एकै टीमका खेलाडीलाई यति धेरै कार्ड पहिलो पटक पोखरा रंगशालामा प्रयोग भएको छ । तनावपूर्ण खेलमा ८ पहेंलो कार्ड र २ रेड कार्ड प्रयोग भएको छ । श्रवण लामा चोटपछि १८ औं मिनेटमा बाहिरिएसँगै सो जिम्मेवारी लिएका रेफ्री सुदीशकुमार पाण्डेले बंगलादेशका ६ खेलाडीलाई पहेँलो कार्ड देखाउँदा यी मध्ये जनाले २ रातो कार्ड पाए भने सुदूरपश्चिमका २ खेलाडीले पहेंलो कार्ड व्यहोरे ।

दुई गोलले अग्रता लिएपछि सम्हालिनुपर्ने बंगलादेश उल्टै आक्रामक बन्यो । बल प्रहार गर्दा बिपक्षीलाई लडाउने तथा तान्ने गरेपछि रेफ्री पाण्डेले ९० मिनेटको निर्धारित समय सकिएर थपिएको ५ मिनेटको पहिलो मिनेटमा बंगलादेशका काण्डे लानसानेलाई दोस्रो पहेँलो कार्ड दिँदै मैदान बाहिर पठाए ।

काण्डेलाई रातो कार्ड दिएकोमा रिसाएका बंगलादेशी खेलाडी एक पछि अर्को गरी कार्ड पाए । गलत ट्याकल गरेपछि पहेँलो कार्ड ब्यहोरिसकेका सिल्ला सोन्लेमेनले अन्तिम इन्जुरी मिनेटमा रेफ्रीलाई अपशब्द बोलेपछि उनलाई सिधै रातो कार्ड देखाईएको थियो ।

लगातार दुई खेलाडीले लगातार रातो कार्ड पाएपछि बंगलादेशी खेलाडीहरुले विरोध जनाउँदै खेल छाड्ने चेतावनी दिए भने बंगलादेशी अफिसियल बिरोध जनाउँदै मैदान प्रवेश गर्ने प्रयास गरे । यो विवादले खेल नै रोकियो । विवादपछि ईन्जुरी समयमा थपिएको ५ मिनेटको खेल धेरै बेर खेलाएकाले बंगलादेशी खेलाडीको आपत्ति रह्यो ।

बंगलादेशका प्रशिक्षक महबुब आलम मनिकले खेल राम्रो भएपनि रेफ्रीले एकतर्फी खेल खेलाएको आरोप लगाए । केहि बोल्ने वित्तिकै वा सामान्य ट्याकलमा पनि कार्ड दिएर खेलाडीलाई उत्तेजित बनाएको उनको आरोप थियो ।

टीम कोओर्डिनेटर हसन अहमदले खेल राम्रो भएपनि अन्तिममा रेफ्रीले गलत निर्णय गरेको आरोप लगाए । उनले खेलाडीहरुले रेफ्रीलाई नराम्रो नगरेको तर रेफ्रीले गलत निर्णय गर्दा स्वभाविक रुपमा विरोध जनाएको दाबी गरे । पोखरामा पहिलो पटक आएको उक्त क्लबका पदाधिकारीले आफूहरुलाई चित्त नबुझेको गुनासो गरे । अब बंगलादेशी टीमका दुई मुख्य खेलाडी आगामी खेलमा हुनेछैन ।

सुदूर पश्चिमका प्रशिक्षक सुरेश हमालले खेल राम्रो खेलेपनि फिनिसिङ कमजोरीका कारण हार बेहोर्नुपरेको प्रतिक्रिया दिए । पेनाल्टी गुमाउँदा नै नतिजा ठ्याक्कै उल्टियो नि ? भन्ने प्रश्नमा उनले पोखराकै भएका कारण धिरज गुरुङलाई दिएको, बुबाआमा नभएको उदयीमान युवाले आफ्नो होमग्राउण्डमा छाप छाडोस् भन्ने मौका दिएपनि सदुपयोग नहुँदा दुःख नलागेको उनको भनाई थियो ।

प्रतियोगिता अन्तर्गत आइतबार दोश्रो क्वाटरफाइनल खेलमा त्रिभुवन आर्मी क्लव र धरान फुटवल क्लब सुनसरीबीच प्रतिष्पर्धा हुनेछ । धरानको यो १४ औं सहभागिता हो । उसले पहिलो खेलमा पाहुना टोली युनाईटेड सिक्किम एफसीलाई ३–० गोलले पराजित गरेको थियो । आर्मी भने सिधै बाइ पाएर पहिलो खेल खेल्दैछ । गत वर्ष आयोजक सहारा क्लबसँग सेमिफाईनलमा टाईब्रेकरमा हारेको आर्मीको यो ११ औं सहभागिता हो । १४ औं, सातौं र आठौं संस्करणमा गरी आर्मीले तीन पटक फाईनल खेलेपनि उपाधि विमुख छ ।

आजको खेल
त्रिभुवन आर्मी क्लब र धरान फुटबल क्लब

Pic. Goalnepal.com