पोखरा, ३ मंसिर / युवाहरुको पोखरामै जेठो संस्था पोखरा जेसीजको वर्ष २०१८ को अध्यक्षमा शिव सुवेदी निर्वाचित भएका छन् ।

निर्वाचन पश्चात शनिबार भर्खरै राति १ बजे सकिएको मतगणनामा सुवेदी शालिकराम गिरीलाई २ मतको झिनो अन्तरले हराउँदै अध्यक्षमा निर्वाचित भएका हुन् । सुवेदीले ४७ तथा गिरीले ४५ मत प्राप्त गरे ।

यस्तै, कार्यकारीणी उपाध्यक्ष देवराज शर्मा, महासचिवमा गणेश गिरी, सचिवमा शक्ति बरुवाल, कोषाध्यक्षमा छवि पनेरु, कानुनी सल्लाहकारमा शिवप्रसाद सापकोटा चयन भएका छन् ।

शालिकराम गिरी (शितल) लाई अध्यक्षीय सल्लाहकारमा मनोनित गरिएको छ । गिरी यसअघि कार्यसमितिमा कानुनी सल्लाहकार थिए । गिरी सुपरहिट गीत म बिना कसैकसैलाई मुस्किल छ पोखरामा गीतका सर्जक हुन् । नवनिर्वाचित अध्यक्ष सुवेदी युनाईटेड इन्स्योरेन्सका पोखरा ब्राञ्च म्यानेजर हुन् ।

३८ औं शाखा अधिवेशन तथा ४३ औं वार्षिक साधारणसभाले नयाँ कार्यसमिति चयन गरेको अधिवेशन निर्देशक तथा पूर्व अध्यक्ष गोविन्दप्रसाद देवकोटाले जानकारी दिए । वर्ष २०१७ का अध्यक्ष शिवप्रसाद कोईरालाको अध्यक्षतामा कार्यक्रम भएको थियो ।