गण्डकी प्रदेशका मुख्यमन्त्रीसहित नौ मन्त्रीहरुको सम्पति विवरण सार्वजनिक भएको छ । ११ सदस्यीय मन्त्रीमण्डलमा नौ जनाले दुई महिनापछि सार्वजनिक गर्दा दुई जनाले अझै सार्वजनिक गरेका छैनन् ।

मुख्यमन्त्री तथा मन्त्रिपरिषद्को कार्यालयले आफिसियल वेबसाइटमार्फत मंगलबार नौ मन्त्रीको सम्पत्ति विवरण सार्वजनिक गरेको हो । युवा तथा खेलकुदमन्त्री दीपक मनाङे र भूमि व्यवस्था, कृषि तथा सहकारीमन्त्री चन्द्रबहादुर बुढाले सम्पत्ति विवरण बुझाएका छैनन् ।

मन्त्रीको सम्पति सार्वजनिक भएपछि मुख्यमन्त्रीको २५ लाख ऋण, अर्थमन्त्रीको निफ्राको ६० कित्ता शेयरदेखि शिक्षामन्त्री मेखलाल श्रेष्ठको १ किलो १९ तोला सुनको चर्चा व्यापक छ ।

मुख्यमन्त्री कृष्णचन्द्र नेपाली पोखरेलको सम्पत्ति

गण्डकीका मुख्यमन्त्री कृष्णचन्द्र नेपाली पोखरेलले सम्पत्ति विवरणमा कृषि विकास बैंकबाट २५ लाख रुपैयाँ ऋण देखाएका छन् । तलबबाट आएको पाँच लाख नगद एभरेष्ट बैंकमा रहेको पनि उल्लेख गरेका छन् ।

सुनचाँदी÷जग्गाजमिनको हकमा पाँच तोला सुन र श्रीमती लता पोखरेलको नाममा गैँडाकोटमा २० लाख रुपैयाँको एउटा घर देखाएका छन् । मुख्यमन्त्री पोखरेलको नाममा काठमाडौं र तनहुँमा पनि जग्गा रहेको छ ।

अर्थमन्त्री रामजीप्रसाद बरालको सम्पत्ति

कास्की घर भएका अर्थमन्त्री रामजीप्रसाद बरालले गत वर्ष मात्रै एक करोड रुपैयाँ ऋण लिएको उल्लेख गरेका छन् । एनआईसी एसिया बैंकबाट लिएको ऋण किन ? भन्ने खुलेको छैन ।

निफ्राको ६० कित्ते शेयरवालाका रुपमा पनि देखाएका छन् । गाई किन्दा ६० हजार, सवारीसाधनको नाममा छोरा बुहारीका २ मोटरसाइकल र १ स्कुटर उल्लेख गरेका छन ।

पोखरामा श्रीमतीको संयुक्त नाममा जग्गा रहेको छ । मन्त्रीले चार तोला सुन रहेको विवरणमा खुलाएका छन् । एभरेष्ट बैंकमा तीन लाख नगद मौज्दात उनले आम्दानी देखाएका छन् ।

कानुन तथा सञ्चार मन्त्री विन्दुकुमार थापाको सम्पत्ति

कानुन, सञ्चार तथा प्रदेशसभा मामिलामन्त्री विन्दुकुमार थापा देखिएका छन् । उनको नाममा पोखराका विभिन्न ६ ठाउँमा घर, ८ ठाउँमा जग्गा रहेको उल्लेख गरिएको छ । पोखराका विभिन्न ठाउँमा दुई श्रीमती, छोराको नाममा जग्गाहरु देखाएका छन् ।

झण्डै दर्जन बैंकहरुमा १० करोड जति बैंक मौज्दात, परिवारको साढे सात लाख कित्ता सेयर सम्पत्ति, १५ तोला हिरा, ९० तोला सुन, ५० तोला चाँदी । पोखराका परिचित व्यवसायी रहेका उनीसँग दुईवटा गाडी, होटेल, ट्रेड हाउस, मल, रिसोर्टलगायतमा लगानी रहेको स्पष्ट पारेका छन् ।

पाँच वित्तीय संस्थामा ऋण पनि देखाएका छन् भने घरमा नगद ५५ हजार रुपैयाँ रहेको उल्लेख गरेका छन् ।

शिक्षामन्त्री मेखलाल श्रेष्ठको सम्पति

गण्डकीका शिक्षा तथा सामाजिक विकासमन्त्री मेखलाल श्रेष्ठसँग एक किलो १९ तोला सुन छ । सात किलो दुई तोला चाँदी र एकथान हीराको औँठी मन्त्री श्रेष्ठले सम्पत्ति विवरणमा देखाएका छन् ।

१५ लाख नगद रहेका मन्त्री श्रेष्ठले आफ्नो सम्पतिको स्रोत पैतृक तथा पेवा उल्लेख गरेका छन् ।

स्याङ्जाको भिरकोट र काठमाडौंको नागार्जुनमा पक्की घर, स्याङ्जा, काठमाडौं र कास्कीको छिनेडाँडामा जग्गा रहेको उल्लेख गरेका छन् ।

ऊर्जामन्त्री हरिशरण आचार्यको सम्पत्ति

ऊर्जामन्त्री हरिशरण आचार्यले कृषि विकास र प्रभु बैंकबाट लिएको ५० लाख ऋणमा अझै ४० लाख तिर्न बाँकी उल्लेख गरेका छन् । जुन ऋणमध्ये २० लाखमा फर्निचर उद्योग सञ्चालन गरेको प्रष्टाएका छन् ।

थाँतथलो गोरखाको पालुङटार–२ मा बुवा र श्रीमतीको नाममा घरजग्गा रहेको भनेका छन् । मन्त्री आचार्यले आठ तोला सुन र पाँच तोला चाँदी सार्वजनिक गरेका छन् ।

पर्यटनमन्त्री मणिभद्र शर्माको सम्पत्ति

पर्यटनमन्त्री मणिभद्र शर्मा कँडेलसँग आफ्नो जन्मठाउँ बागलुङको काठेखोलास्थित लेखानीमा ६ ठाउँमा जग्गा रहेको उल्लेख गरेका छन् । यस्तै, चितवनमा पाँच ठाउँ, रुपन्देहीमा नौ तथा इन्द्रकली कँडेलको नाममा चितवनमा नै तीन ठाउँमा जग्गा देखाएका छन् ।

मन्त्री कँडेलसँग बागलुङ नगरपालिकामा ४८ लाख ५० हजारमा किनेको घर छ । २५ तोला सुन तथा एक किलो चाँदी, आफ्नो नाममा ६ लाख नगद तथा इन्द्रकली कँडेलको नाममा झन्डै दुई लाख रुपैयाँ नगद मौज्दात देखाएका छन् ।

झन्डै ८७ हजार कित्ता सेयर देखाएका उनले दुई करोड ६७ लाख ऋण रहेको पनि सम्पत्ति विवरणमा उल्लेख गरेका छन् ।

भौतिक पूर्वाधार विकासमन्त्री कुमार खड्काको सम्पत्ति

भौतिक पूर्वाधार विकासमन्त्री कुमार खड्काको नाममा पोखरा महानगरपालिका १६ मा घर छ । यो पैत्रिक सम्पतिमा स्वआर्जन जोडेका छन् ।

विभिन्न वित्तीय संस्थामा एक करोड बढी नगद मौज्दात, ९५ तोला सुन, ५६ लाखको सेयर तथा ८५ लाख ऋणमा लगाएको पनि उनले सम्पत्ति विवरणमा उल्लेख गरेका छन् ।

बनमन्त्री दीपक थापाको सम्पत्ति

बनमन्त्री दीपक थापा चर्ती मगरले स्याङ्जाको बिरुवा गाउँपालिका–२ मा ५० हजार रुपैयाँमा घर किनेको उल्लेख गरेका छन् । उनले पोखरा महानगरपालिका १४ मा ४० लाखको जग्गा पनि किनेको विवरण सार्वजनिक गरेका छन् । सांसद हुँदाको तलब, छोराको आर्जन र विदेशमा रहेका छोराछोरीले पठाएको भनेर खुलाएका छन् ।

मन्त्री थापासँग ३० तोला सुन र २० तोला चाँदी पैतृक सम्पत्ति छ । ६१ लाख ५० हजार ऋण देखाएका उनले चर्ती नर्सरी उद्योग खोलेर चियाका बिरुवा उत्पादन गर्दै आएको पनि उल्लेख गरेका छन् ।

स्वास्थ्यमन्त्री मधुमाया अधिकारी गुरुङको सम्पत्ति

स्वास्थ्य तथा जनसंख्यामन्त्री मधुमाया अधिकारी गुरुङको नाममा लमजुङको दूधपोखरीमा घर छ । यस्तै, लमजुङ, चितवन र हेटौँडामा गरी चार ठाउँमा जग्गा रहेको पनि उल्लेख गरेकी छन् । तीन तोला सुन तथा आठ लाख ६० हजार नगद मौज्दात रहेको पनि उल्लेख गरेकी छन् । उनी ११ सदस्यीय मन्त्रीपरिषद्मा एक्लो महिला मन्त्री हुन् ।

मन्त्रीहरुको पूरा सम्पति विवरण सोझै हेर्न माथिका मन्त्रीको नाम लेखिएको सबहेडिङ क्लिक गर्नुहोस्