शुक्रबार सबेरै मस्तिष्कघात भएपछि मनिपाल हस्पिटलबाट थप उपचारका लागि काठमाण्डौ लगिएका पोखरा महानगरपालिका मेयर मानबहाुदर जिसीको बाँसबारी स्थित न्यूरो (स्नायू) हस्पिटलमा उपचार भइरहेको छ ।

अहिले मेयर जिसीको विशेषज्ञ चिकित्सकको प्रत्यक्ष निगरानीमा उपचार भइरहेको छ । मेयर जिसीको स्वास्थ्य स्थिर र सुधारोन्मुख रहेकको मेयरका प्रेस सल्लाहकार माधव बरालले जानकारी दिए । काठमाण्डौ पुग्नासाथ न्यूरो हस्पिटलमा टाउकोको एमआरआई गरी केही औषधी चलाइरहेको र त्यसबाट सुधार भए शल्यक्रिया गर्नुनपर्ने चिकित्सकको भनाई छ । चिकित्सकहरुले शरीर सुन्निँदै गएमात्रै शल्यक्रिया गर्नुपर्ने नत्र औषधीकै आधारमा सञ्चो हुँदै जाने बताएका छन् ।

मेयर जिसीको उपचारमा प्रत्यक्ष संलग्न डा. बालगोपाल कर्माचार्यका अनुसार मेयर जिसीलाई हृदयघात नभई मस्तिष्कघात भएको बताए । उनले मेयर जिसीलाई पोखरामा रगत पातलो बनाउने औषधि दिइएको र थप उपचारका लागि काठमाण्डौ लगिएको बताए । मेयर जिसीलाई असहज हुनासाथ अस्पताल ल्याएर सो औषधि चलाउन पाएको भए उत्तम हुने थियो भन्दै अलि ढिला भएतापनि राम्रै प्रभाव परेको बताए ।

शुक्रबार बिहान ४ बजे अचानक अप्ठेरो महसुस गरेका उनलाई मेडिप्लस हस्पिटल लगिएको थियो । थप उपचारका लागि मनिपाल शिक्षण अस्पताल लगिएको हो । चिकित्सकीय सल्लाहमै मेयरलाई शुक्रबार मध्यान्ह १२ बजे हेलिकोप्टरमा काठमाडौं लगिएको हो । मौसमका कारण हेलिकप्टर उडानमा ढिलाई भएको थियो ।

मेयर जिसीलाई न्यूरो अस्पतालमा दिउँसो गण्डकी प्रदेशका पूर्वमुख्यमन्त्री पृथ्वीसुब्बा गुरुङ, एमाले गण्डकी अध्यक्ष जगत विश्वकर्मा, पोखराका उपमेयर मञ्जुदेवी गुरुङ, पोखरा १३ का वडाध्यक्ष दर्शन लामा लगायतले भेटेका थिए । मेयर जिसीको मस्तिष्कको एउटा नसामा सामान्य अवरोध देखिएको छ । उनको देब्रेहरमा त्यसले असर गरेको छ ।

पोखराका विभिन्न व्यक्ति तथा संघसंस्थाले मेयर जिसीको स्वास्थ्य लाभको कामना गरेका छन् । महानगर प्रवक्ता धनबहादुर नेपालीले एक विज्ञप्ति निकालेर मेयर जिसीको स्वास्थ्य लाभको कामना गर्दै मेयरको स्वास्थ्यस्थितिका बारेमा नगरबासीलाई औपचारिक जानकारी गराएका छन् ।