पोखरा महानगरमा शुक्रबार दिउँसो फेरि ११ जनामा कोरोना सक्रमण पुष्टि भएको छ । यसअघि दुई पटकको सूचनामा ३ र २ जना गरी ५ जना थपिसकेका छन् । यससँगै अहिलेसम्म थप १६ जना पोखरेलीमा कोरोना संक्रमण देखिएको छ ।

गण्डकी प्रदेश स्वास्थ्य निर्देशनालयले शुक्रबार जारी गरेको तेस्रो चरणको विज्ञप्तिमा पोखराका बैंकका कर्मचारी, ईञ्जिनियर कन्सल्टेन्सी र मोबाइल पसले सहित थप ११ जनामा संक्रमण पुष्टि भएको जनाएको छ ।

सङ्क्रमित हुनेमा पोखरा – २ का कामना विकास बैङ्कमा दीप शाखामा कार्यरत २५ वर्षीय पुरुष, पोखरा – ३ का एभरेस्ट बैङ्क अमर सिंह चोक शाखामा कार्यरत २९ वर्षीय पुरुष, इन्जिनियरिङ कन्सल्टेन्सीमा कार्यरत पोखरा – १४ का ३५ वर्षीय पुरुष, पोखरा – ५ का औद्योगिक क्षेत्रमा कार्यरत ३३ वर्षीय पुरुष तथा पोखरा वडा नं १ का मोबाइल पसलका सञ्चालक १८ वर्षीय पुरुष रहेको निर्देशनालयले जनाएको छ ।

शुक्रबार दिउँसो नै पोखरा ११ की ५६ वर्षीया महिला, पोखरा – १४ का २७ वर्षिय पुरुष, पोखरा १६ का १५ र ३९ वर्षीय महिला तथा ३५ र ४९ वर्षका पुरुषमा कोरोना देखिएको निर्देशनालयले जनाएको छ ।

यसअघि, शुक्रबार जारी गरेको दोस्रो चरणको विज्ञप्तिमा पोखरा १६ का ५२ र ६८ वर्षका दुई पुरुषमा कोरोना सक्रमण पुष्टि भएको थियो । निर्देशनालयले पोखराको फिस्टेल हस्पिटलबाट लक्षण देखिएपछि २ पुरुषलाई पोखरा स्वास्थ्य विज्ञान प्रतिष्ठानमा पठाइएको जनाएको छ । शुक्रबार बिहान नवलपुर गैँडाकोट ८ का २९ वर्षीय पुरुषमा पनि कोरोना पुष्टि भएको थियो ।

यस्तै, आजको पहिलो सूचना अनुसार पोखरा महानगरपालिकामा शुक्रबार बिहान थप ३ जनामा कोरोना सक्रमण पुष्टि भएको थियो । थप दुई पुरुष र एक महिलामा कोरोना देखिएको जनाएको छ । निर्देशनालयका अनुसार पोखरा – १७ का २८ र २९ वर्षका दुई पुरुष तथा पोखरा – ३० की ५० वर्षीया महिलामा कोरोना सक्रमण पुष्टि भएको हो । दुई पुरुष पर्यटक प्रहरी हुन् ।

यस्तै, बिहान तनहुँका २ पालिकाका ४ जना पुरुष , लमजुङका २ पालिकाका १–१ महिला पुरुष तथा नवलपुरका २ पालिकाका ५ महिला र ३ पुरुषमा समेत कोरोना पुष्टि भएको जनाएको छ । अध्यावधिक विवरण अनुसार गण्डकी प्रदेशमा कोरोना संक्रमितको संख्या २०३६ पुगेको छ ।